Diegcoj gou youq Hozciz, gizneix gingj gyaeu lumj doz, seiq geiq va hai, dwg dieg ndei habngamj vunz youq ndeu. Gou gyaez diegcoj gou, engq gyaez yozyau swhgeij.

Gaijgwz hailangh daeuj, diegcoj gou caeuq daengx guek gak dieg ityiengh caez yamq haeuj ndaw langh ndathwngq foedfoed ginghci gensez, gunghcangj hung lumj rangz seizcin nei diegdieg cungj miz. Aenvih haifat gvaqbouh, gunghcangj daihliengh baiz ok hoenzien, hawj vanzging uqlah, ndoengfaex doiqvaq, raemx namh lae saet, faenzuq mbinbyang, caihaih ciengz miz……Diegcoj yienzbonj gyaeundei haenx deng sieng ndaej saeknaj cungj bienq lo, vunz cungj mbouj miz sim bae yawj.

Daj swcigih yinzminz cwngfuj daezok guh “Gyaeundei Gvangjsih·Seuqcingh Lajmbanj” hozdung le, gyoengqvunz lajmbanj cungj gaenx camgya haeuj ciengz hozdung neix daeuj, dawz guh seuq veiswngh lajmbanj hozdung guh ndaej hoenghhwdhwd. Seizcin, gyoengqvunz lajmbanj ndaem faex caux ndoeng, hawj diegdeih longz buhheu, hawj bya’ndoi cang ndangdaej; seizhah, sou haeux sat lo, gyoengqvunz lajmbanj dawz fiengzhaeux boiz hawj ndawnaz, demgya feizliu; seizcou, gyoengqvunz lajmbanj mbouj dwk- nyaen, gyaez duzroeg, henhoh doenghduz; cin、hah、cou、doeng gyoengqvunz lajmbanj gag baujciz gyahyenz swnghdai bingzyaenx, vih gensez mbanjranz gyaeundei yienh’ok faenh rengz swhgeij.

Vihliux ngoenzneix, vihliux ngoenzcog, vihliux gensez aen siengjmuengh gyaeundei Cungguek, caezgya cungj gyaezhoh diegcoj dou, gvensim aen digiuz raeuz youq neix, daj gou guh hwnj, yungh saehsaed hengzdoengh hoizbauq daxmeh digiuz lo. Dangguh boux siuj hagseng, gensez gyaeundei Cungguek, raeuz hix wnggai daj dajcauh swnghdai yauyenz hainduj. Raeuz ciengzseiz yawjraen miz haujlai doengzhag gag youq ndaw yauyenz dieggungx gip naengmak gip ceij doek, hawj ndaw yauyenz moix dieg gungx cungj seuqsat. Hoeng lijmiz di yienhsiengq ndeu hawj vunz sim’in, haenx dwg: Lij miz mbangj doengzhag luenh gveng ceij roxnaeuz daehsuliu; lij miz mbangj doengzhag youq gwnz diegrum luenh caij luenh daemh, ndaw dieg nywjheu ciengz miz nge faex raek. Yauyenz dwg dieg hagsib raeuz, dwg aen suen raeuz vaiqvued majhung, dangguh boux hagseng ndaw yozyau, raeuz wnggai baujhoh dieg nywjheu ndaw yozyau, okrengz bae cienzboq gij lijnen saekloeg, yungh hengzdoengh rap hwnj aen rap naek gensez swnghdai yauyenz!

Ngoenzneix diegcoj bienq ndaej yied daeuj yied ndei lo, gij vanzging yozyau diegcoj hix bienq ndaej yied daeuj yied hawj vunz sim’angq lo. Gou gyaez diegcoj, engq gyaez yozyau diegcoj.

(指导老师：韦爱搬)