Doengzhag daiz laeng gou heuh guh Siujfeih. De mboujdanh yozsiz ndei, lij gyaez bangcoh bouxwnq.

Ngoenz ndeu yaek cuengqhag seiz, gwnzmbwn sawqmwh doek fwn hung roengzdaeuj. Ngoenzhaenx gou mbouj daiq liengj, cuengqhag lo, raen gyoengq doengzhag wnq cungj cengq liengj baema ranz lo, gou gip dwk yaek daej okdaeuj. Seizneix, Siujfeih byaij gvaqdaeuj doiq gou naeuz:“Danghnaeuz mwngz mbouj yiemz, raeuz caez yungh aen liengj neix ba!” Gou angq dwk naeuz:“Ndei ha! Docih mwngz.” Yienghneix, gou caeuq Siuj- feih gungh cengq aen liengj haenx baema ranz. Youq gwnz loh ma ranz, de itcig dawz liengj nyoengx gvaq mbiengj gou, caj de soengq gou ma daengz ranz, gou cij fatyienh gwnz ndang gou di hix mbouj dumz, hoeng ndang de mbiengj ndeu cungj dumz lo. Gou gikdoengh dwk doiq de naeuz:“Docih mwngz, Siujfeih. Mwngz yawj, buhvaq mwngz cungj dumz lo, haeuj ranz gou bae vuenh geu buh ndeu ba!” De sikhaek ngauz gyaeuj naeuz:“Mbouj youqgaenj, gou ma ranz vuenh couh ndaej lo, caiqraen.” Gangj sat, de cienq ndang couh baema lo. Yawj baihlaeng de yied bae yied gyae haenx, gou gamjdoengh dwk raemxda lae roengzdaeuj lo.

Neix couh dwg doengzhag gou——Siujfeih, de ciengzciengz vih bouxwnq yienghneix ngeixsiengj, cig- ndaej raeuz vunzlai hagsib!

(指导老师：邓秀妮)