Yawj daengz diuz daezmoeg neix, gou nyaenx mbouj ndaej siengj hwnj boux doengzhag iq mbouj rox mingzcoh ndeu.

Dauqngeix bi gaxgonq, mbwn lamzsuemsuem, va hoengzswdswd, doengh gij doxgaiq seiqhenz cungj dwg yienghneix gyaeundei. Aen dou duzsuhsiz ndaw hagdangz hai lo, gyoengq doengzhag lumj duzroeg ngamq ok roengq nei, ceng gonq lau laeng cung haeujbae. Gou caemhdwg ityiengh, haeujbae le, senj ndei giz deihfueng dep henz cueng ndeu, ngamq naengh roengzdaeuj, gou couh raen gwnz gyaqsaw miz bonj saw gyaeu ndeu, gou couh ganjgip iet fwngz okbae, siengj yot de okdaeuj, hoeng de lumjnaeuz deng gijmaz doxgaiq nep dawz nei, baenzlawz hix yot mbouj okdaeuj. Gou huj lo, couh yungh rengz rag de, “ga——ca——”sing ndeu, saw deng gou rag okdaeuj lo, hoeng, gij fungmienh ndeiyawj haenx deng faen baenz song mbiengj lo, gou dinghdingh ndwn youq gizhaenx, mbouj rox yaek baenzlawz guh. “Daeggo, mwngz sik bonj saw neix vaih lo!” Gij singyaem iqetet ndeu cienz haeuj ndaw rwz gou. Gou ngiengx gyaeuj baez muengh, yienzlaiz dwg boux doengzhag iq naengh youq henz ndang gou haenx naeuz gou. Cehda gou youh yawj dauq daengz bonj saw deng gou sik vaih haenx,“365 Aen Gojgaeq”geij cih saw lwenqda neix ingj haeuj ndaw da gou. Seizneix, boux doengz- hag iq neix caemh hai aen daehsaw, dawz bonjsaw 《365 Aen Gojgaeq》 ndeu ndenq hawj gou, naeuz：“Daeggo, mwngz aeu bonj saw neix boiz hagdangz ba, bonj saw deng sik vaih neix, couh aeu hawj gou suenq lo.”Gou gig doeksaet, laihnaeuz bonjfaenh dingq loek lo. Mbouj! Neix dwg caen! Dang gou caiq baez ndeu dingqnyi gij sing iqetet neix seiz, ndaw sim baez ndat, gikdoengh dwk naeuz：“Docih mwngz lo, doengzhag iq！”Hoeng gou lij caengz ndaej cam gij mingzcoh de, de couh lumj duz douqlwg ndeu ityiengh diuq okbae lo. Muengh gij ngaeuz daemqded iqet haenx, gou roxnyinh caen dwg gig dwggyaez.

Seizneix, moix baez gou dauqngeix mwhhaenx, ndaw sim raeujrubrub, hawj gou caiq gangj sing ndeu：“Doengzhag iq dwggyaez, docih mwngz.”

（指导老师：刘丽娜）