Vwnzva gyauyuz、ywbingh veiswngh daengj caemh miz haujlai vwndiz yienhda.

Veiz Gozcingh baezbaez daengz dieglaux ngonzcaz, cungj vihliux gij dieg hoj neix gamjdaengz sim’in.

Bi 1964 ndwen 2 yaek gvaq cieng mwh haenx, Veiz Gozcingh doiq Cinz Yinggih naeuz:“Mboengqneix, gou ciengz naemj gij saeh hwnjguh dieglaux. Gaijfang ndaej 10 lai bi lo, gij dieg neix vanzlij hoj raixcaix, sim miz di get ha!”

“Vunzlai dieglaux gwndaenj hoj lai, dou gij vunz ndaej lix roengzdaeuj haenx miz cwzyin a!” Cinz Yinggih simcingz caemh naekgywggywg.

Veiz Gozcingh daez yigen naeuz: “Bineix gvaq cieng raeuz bae Baksaek ndei lwi?”

“Ndei!” Cinz Yinggih gig haenh- doengz, de naeuz:“Gou bae anbaiz anbaiz.”

Haemhndaep ngoenzde, bouxboux nyaengq gvaq cieng, hoeng Veiz Gozcingh caeuq Cinz Yinggih naengh ruz youq gwnz Dahyougyangh, yaek bae Baksaek. Daengz Bingzgoj le roengz ruz gonq, gyoengqde hwnj bya bae ra gvangqlijduj. Youq gizneix, miz aen gvangqcangz lijduj daegbied hung seiqgyaiq noix raen ndeu, binjvei sang, caemhcaiq cujyau dwg gvangq- daenz, ndaej youq lohmbwn vat. Seizhaenx, swcigih gaenq dajsuenq youq Bingzgoj guh cangj lijgvangq. Cinz Yinggih naeuz: “Gizneix vanzcienz miz diuzgen guh aen cangj lijgvangq hung ndeu, raeuz yaek ceng ndaej cunghyangh cinjhawj, caenhvaiq hwnjmax.” Veiz Gozcingh naeuz: “Mboengqneix siengj ndaej hwnjmax lau mbangj lij miz gunnanz, hoeng daj seizneix hwnj wnggai haidaeuz ngeix- yaeng, daez gij fueng’anq guh ndaej doeng haenx okdaeuj, ceng ndaej cunghyangh dingjrengz, 'gij giva 3.5'mbouj ndaej hwnj, ceng youq“4.5” ndaej hwnj caemh ndei ha! Hwnjmax ndaej yied vaiq, doiq gaijbienq dieglaux gungzhoj caeuq najyiengh Guengjsae cix yied mizleih.”

Gij siengjmuengh gyoengqde doeklaeng ndaej saedyienh lo, cijdwg seizgan doilaeng le haujlai bi. Seizneix, Bingzgoj gaenq baenz aen dieggoek gunghyez lij daegbied daihhingz daengx guek ndeu.

(caengz sat)