Ndei lienh mwngz le youx

Mwhndouj(nduj) dwg caemh ranz

Boux guh yah guh gvan

Gwndaenj van lumj dangz

Caeuq mwngz lienh le youx

Cuengq mbouj roengz aen sim

Doek saek gaemz ngaenzgim

Sim mbouj in baenzneix

Nwh mwngz lai le youx

Gouj ngoenz mbouj swiq ndang

Caekhaex youh hwnj cang

Daengx ndang mbouj baenz youq

Siengj youx lai baenzbag

Cag venj hoz mbouj dai

Cax gvej noh dang mai

Docih gvai daeuj gaeuq

Nwh youx lai vaih saek

Naek youx lai vaih siengq

Vaih simdaeuz song mbiengj

Sieng bakaek hwnj bop

Niemh youx lai byomroz

Lwed saihoz doek dungx

Gwn yw mbouj miz yungh

Nuengx daengz cungj raen ndei

Siengj youx lai simfanz

Hongranz goj gik guh

Bakdou lae raemxuq

Nyapnyaj duj rim congz

Lienh mwngz lienh daengz ngeiz

Byaij roen mbaeqmbingmbing

Vunz dongx mbouj ok sing

Mbouj rox singq gijmaz

Nwh youx daengz ndangsaenq

Daenj haiz goj loeng ga

Gaem cenjcaz da va

Doek fwngz ma le dek

Ngoenz mbouj raen youx daengz

Naengh goj naengh mbouj onj

Deq daengz laep daengz fonx

Ndonj ok dou bae ngonz

Siengj youx siengj yaek dai

Caeuz ngaiz cungj mbouj ndwnj

Loq raen mwngz daeuj bwnq

Daindiu hwnqdaeuj nyaemz

Lienh mwngz lienh daengz byai

Maij mwngz maij daengx ciuh

Mbe fwed mbin lumj yiuh

Ciuh laeng lij caemh rongz