(Ciep geiz gonq)

Gvaq yaep ndeu, Naxlanz ciemhciemh dingh roengzdaeuj lo, Dahmeiz gaem fwngz Naxlamz naeuz:“Nax, doiq mbouj hwnj, gou mbouj dwg daegdaengq gik mwngz, gou dwg mbouj siengj hawj mwngz baenz sinhoj cij mbouj siengj caiq doeg saw, mwngz yawj mwngz caengz daengz seiqcib bi, naj couh nyaeuq lo, gou yawj le sim’in ha.” Naxlanz lumh gyaeuj Dahmeiz naeuz:“Dahhux neix, mwngz baenz- lawz ndaej yienghneix siengj ni, mwngz mbouj doeg saw, siengj ciuhvunz cungj youq lajmbanj sinhoj guh hong nazreih ha, mwngz itdingh aeu miz ceiqheiq, mboujni nax baenz- lawz yiengq meh mwngz gyaudaih ha, caiq gangj nax maqmuengh doeklaeng ndaej riengz mwngz yiengjfuk ni.”Gangj le couh dawz Dahmeiz got haeuj rumj bae.

Hai hag gaxgonq, Naxlanz ciq cienz gaeuq Dahmeiz gyau yozfei lo. Vihliux gung Dahmeiz doeg saw, Naxlanz engq sinhoj lo, de cawz guh reihnaz le, lij ciengx mou ciengx gaeq, bae ndaw bya vat ywdoj gai. Dahmeiz doeg gauhcungh sam bi, Naxlanz mbouj dem saek geu buhvaq, de yienznaeuz ciengx miz gaeq, cix mbouj gaj gaeq gwn gvaq, de mbaet gwn mbaet yungh, cungj suenq gungh Dahmeiz doeg sat gauhcungh lo. Dahmeiz gig cengqheiq, youq hagdangz hagsib cingzcik itcig cungj gig ndei, ciuq gij cingzcik de, gauj aen dayoz mingzbaiz ndeu wnggai mbouj miz vwndiz, hoeng vih mbouj hawj Naxlanz baenz sinhoj, dienz ciyen seiz, de dienz bauq aen swhfan yenyau mienx yozfei youh dwg youq ndaw sengj haenx. Dayoz seiq bi, Dahmeiz hagsib cingzcik hix gig ndei, de mboujdanh cengaeu ngaenz ciengjhag, caemhcaiq camgya ginzgungh genyoz daeuj gemjmbaeu rap Naxlanz.

Dahmeiz dayoz bizyez le, ma daengz yienh cunghyoz guh lauxsae. Dahmeiz miz cienz lingx lo, ndwen daih’it lingx ndaej gunghswh, Dahmeiz bae cawx geu buh moq ndeu hawj Naxlanz. Haemh haenx, Dahmeiz dawz buhmoq caeuq haj bak maenz ngaenz gyau haeuj fwngz Naxlanz bae, da hamz raemxda naeuz:“Daxmeh, gou cawx geu buh neix hawj mwngz, gij cienz neix dwg hawj mwngz yungh, gou seizneix miz cienz lingx lo, yienznaeuz mbouj lai, hoeng cungj gaeuq mehlwg raeuz gwndaenj ndei gvaq haujlai, mbatlaeng mwngz mbouj yungh sinhoj baenzlai lo.” Naxlanz dingqnyi Dahmeiz heuh swhgeij guh meh, de nyengh yaep ndeu le, hix raemxda lae lo, Dahmeiz dawz Naxlanz goet haeuj rumj bae naeuz:“Mwngz dawz gou daj iq ciengx hung, youh gung gou doeg daengz dayoz, gou caeux couh daj ndaw sim dawz mwngz dang mehcin lo, daj neix hwnj gou couh heuh mwngz guh daxmeh, mbouj caiq heuhguh nax lo.”

Moix daengz couhmoz roxnaeuz ngoenzciet ngoenzgyaj, mboujlwnh benzlawz nyaengq, Dahmeiz cungj dwg ma ranz buenx Naxlanz. Dahmeiz mieng daj neix hwnj, itdingh hawj Naxlanz gvaq ndaej vuenyungz vaiqvued.( sat)