Ngoenzciet conzdungj ceiq nauhyied Bouxcuengh dwg “cietfwen sam nyied sam”. Youq ndawsim gou, gou ceiq muengh aen ciet neix. Youq aen ciet neix, ndaej gwn ngaiznaengj haj saek gou ceiq gyaez gwn haenx. Ngaiznaengj haj saek dwg aeu haeuxniu nyumx saekndaem、saekhoengz、saekaeuj、saekhenj, caiq gya haeuxniu hau doxgyonj cuengq ndaw caengq naengj.

Ngaiznaengj haj saek yienznaeuz ndeigwn, hoeng guh cungj ngaiz neix aeu feiq haujlai goengfou cijndaej. Bineix sam nyied sam, gou caenda yawjraen daxbuz guh ngaiznaengj haj saek. Ngoenzciet sam nyied sam yaek daengz seiz, daxbuz couh laebdaeb cawx caizliuh guh ngaiznaengj haj saek ma lo. Caizliuh cawx ndei le, daxbuz sien yungh fagcax dawz mbawraeu cab baenz donh baenz donh, riengzlaeng dawz gij mbawraeu cuengq haeuj ndaw doiq bae daem geij baez, yienzhaeuh aeu okdaeuj cuengq youq ndaw bat, daek geij rok raemx roengz bat cimq mbawraeu, raemx aeu muenx gvaq mbawraeu. Sam yied co’ngeih gyanghaemh, daxbuz dawz mbawraeu cimq song ngoenz haenx lauz hwnjdaeuj, cij louz raemx, yienzhaeuh dawz gij raemx neix cuengq haeuj ndaw gva gya ndat. Gya ndat daengz baenzlawz cingzdoh ne? Daxbuz gangj cuengq fwngz haeujbae gamjdaengz fwngz ndat couh ndaej lo. Seizneix couh dawz haeuxniu dauj haeuj ndaw bat bae cimq, yienghneix guh haj baez couh mbouj yungh gya ndat lo. Cijaeu dawz haeuxniu cimq daengz ngoenz daihngeih haetromh couh ndaej lo. Gij haeuxniu saekhoengz、 saekaeuj dwg aeu go’gyaemq daeuj nyumx, go’gyaemq cab baenz donh baenz donh le, cuengq haeuj ndaw gva bae cawj, lauz gij nyaq hwnjdaeuj, doeklaeng caj raemx liengz daengz mbouj logfwngz le, couh ndaej dawz haeuxniu dauj haeuj ndaw raemx bae cimq, caj raemx liengz le youh raenz raemx okdaeuj dawz bae gya ndat, caiq cimq haeux, hix dwg yienghneix fanfoek guh geij baez couh ndaej dawz haeuxniu cimq daengz ngoenz daihngeih caj yungh.

Sam yied cosam haetromh, gou lij loq fangzhwnz seiz, daxbuz gaenq hwnqcongz naengj ngaiz haeuxniu. Hwnqcongz le, gou couh buet daengz dieg gwnngaiz, cijraen gwnz daiz gwnngaiz cuengq miz vanj ngaiz hung saekhoengz、saekndaem、saekaeuj、 saekhau、saekhenj ndeu, daegbieg dwg saekndaem, ndaem ndaej ndongqliklik. Gou caj mbouj gib yungh fwngz nyauj gaem ngaiz saekndaem ndeu cuengq haeuj ndaw bak bae, gij rang mbawraeu coemj haeuj ndaw ndaeng bae, gvaq yaep ndeu, gaem ngaiznaengj haj saek couh gwn sat lo. Daxbuz youq henz raen yienghneix cungj yawj ngawz lo, hoeng ndawsim daxbuz angq raixcaix.

Gyoengq baengzyoux, mwngz dwg mbouj dwg hix siengj cimz ngaiznaengj haj saek ne? Danghnaeuz siengj, couh cingj sou bi’moq sam nyied sam daeuj ranz Bouxcuengh dou guhhek ba! Dou couh aeu ngaiznaengj haj saek daeuj dakdaih sou, hawj sou gwn gaeuq bae.

(指导老师：陆银核)