Ngoenzneix dienheiq daegbied cingx, aenmbwn lamzsubsub, daengngoenz ronghsag ciuq dwk daengx ndang raeujrubrub. Ndaw hagdangz dou nauhyied dangqmaz, vihmaz baenzlai nauhyied ne? O, yienzlaiz youq dangqnaj gyauyozlouz cingq gawjhengz nienzgaep bazhoz doxdax ne.

Muengh ha muengh ha, dingqnyi ndaw gvangjbo cienz daeuj “sam nienzgaep it ban caeuq ngeih ban cingj guh ndei bazhoz cunjbi.” Song mbiengj duiyenz sikhaek daeuj daengz gizdieg vixdingh haenx. Banhcujyin cijdauj daihgya gak boux gag baij ndei swhsi. Song fwngz gou lumj fagnep hung gaemdawz diuzcag youh co youh loet gaenjndwtndwt, lauxsae heuh raeuz dawz song cik ga gungq roengzdaeuj, daengx ndang aij dauq baihlaeng.

Seizneix cij yawjraen fan geiz iq ndaw fwngz bouxcaizbuenq baez vad, dingqnyi singsauq yiengj“bit”, duiyenz dou couh lumj duzguk lwg rengzrwdrwd nei maenj faenz maenj heuj okrengz rag. Gij sing hemq“Gyahyouz！ Gyahyouz!”goksadsad rwenz daengz byonghmbwn bae. Yo, duisouj dou rengz caemh hung, song mbiengj mwngz mbouj nyiengh gou, gou engq mbouj nyiengh mwngz, aengiuz hoengz iq venj youq cungqgyang diuzcag haenx yaep swix yaep gvaz bibuengq hwnjdaeuj. Gvaq yaep ndeu, aengiuz hoengz iq menhmenh yiengq ngeih ban nod bae lo, song cik ga gou lumj mbouj dingq cijveih nei yiengq baihnaj soemxsoemx saxsax yamq bae. Gou roxnyinh fajfwngz gou youh byangj youh in, gij rengz daengx ndang lumj yaek yungh caenh nei. Ndawsim gou ngeix: Sat lo, sat lo, baezneix saw dingh lo. Seizhaenx conghrwz gou youh dingqnyi singhemq “It ban gyahyouz! It ban gyahyouz!” Sing hemq “gyahyouz” sing beij sing sang. Banhcujyin dou daihsing hemq “Gaej cuengqfwngz, yamqdin gaej luenh, dingq damzlaeh bae okrengz!” Gij lahlahdui hemq dwk engqgya gok. Ndawsim gou siengj: Gou itdingh genhciz roengzdaeuj, fwngz byangj cungj mbouj leix de! Ngeix daengz neix, gou daengx ndang bienq ndaej engqgya rengzrwdrwd. Gyoengqdou caez caenhrengz, baez yamq baez yamq dawz gyoengq ngeih ban rag gvaqdaeuj. Dingqnyi singsauq boq yiengj, “dou ndaej hingz lo! Dou ndaej hingz lo!” Daihgya youh diuq youh hemq. Ciengz daihngeih song mbiengj doxvuenh cangzdi le, gyoengqdou engqgya saenqsim cibcuk lo. Ciengz doxdax daihngeih, gyoengqdou gig vaiq couh dawz doiqfueng rag gvaqdaeuj lo. “Gyoengqdou hingz lo, gyoengqdou hingz lo!” Daihgya angqfwngfwng diuq hwnjdaeuj bekfwngz angqhoh ndaej hingz.

Baez bazhoz doxdax neix caen nanzlumz ha, hawj dou daiqdaeuj vaiqvued gig lai, hawj gou roxdaengz doxgiet hwnjdaeuj rengz couh engq hung.(指导老师：黄春菊)