Gaxgonq, miz song boux vunz, mwh songde gig dungxiek seiz, miz goenglaux ndeu soengq song yiengh doxgaiq hawj songde: Diuz ganjepbya he caeuq laep bya hung diuq- baengbaeng he. Ndawde, boux he aeu laep bya haenx, lingh boux aeu diuz ganjepbya. Aeu doxgaiq le, songde couh dangq boux dangq byaij lo.

Boux aeu laep bya haenx sikhaek youq dieggaeuq ra fwnz caux feiz cawj bya, de gwn gi gwn guk, caengz cimz ok gij feih ndeigwn nohbya, yaepyet couh lienq bya daiq raemxdang cungj gwn seuqcingh bae, mbouj geij nanz, de couh iek dai youq henz laep byouq lo. Lingh boux haenx dingj dungxiek, gwed diuz ganjepbya baez yamq baez yamq gannanz naiqnuek dwk byaij bae coh haij, hoeng mwh de yawj ndaej raen gizgyae haij lamzyauyau seiz, gwnz ndang di rengz ceiq doeksat haenx cungj sai liux lo, de cijnaengz da yaepmyab yaepmyab yawj daihhaij, doeknaiq sebseb dai bae.

Youh miz song boux dungxiek, doengzyiengh miz goenglaux he soengq diuz ganjepbya caeuq laep bya he hawj songde. Cijdwg songde mbouj dangq boux dangq byaij, dauqdwg siengliengz itheij bae henz haij, songde moix baez cij cawj duz bya ndeu gwn. Songde byaij ha byaij ha, byaij le haujlai gyae, doeklaeng caen byaij daengz henz haij lo, daj neix hwnj, songde hainduj dwkbya gvaq saedceij.

Geij bi gvaqbae le, songde daengj ndaej ranz lo, aeu baz seng lwg lo, lij guh ndaej ruzdwkbya dem, gwndaenj yied daeuj yied fouqmiz, songde cungj ndaej gvaq gij saedceij soengyungz haenx. (Cazlij)