Seizhah dwg aen geiqciet bi ndeu ndawde mbwn ceiq ndat he, ndang vunz suphaeuj caeuq haizok cibfaen hoengh. Gyoengqvunz yungzheih deng gij ndat yingjyangj, ndang vunz gak hangh sengleix goengnaengz caeuq amqbak cungj rox fatseng bienqvaq. Baenzneix, youq aen geiqciet seizhah ndataeng neix, gyoengqraeuz wnggai baenz- lawz diuzcingj cangdai aenndang ne? Baihlaj bang mwngz gaisau di baujgen swnghhoz habngamj seizhah ciengx ndang cihsiz he, hawj mwngz naengz gengangh vaiqvwed bae dohgvaq aen seizhah neix.

1、Gij Huqdiuzfeih Ceiq Ndei——Meiqgwn

Seizhah mbwn ndat ok hanh lai, lai gwn di meiqgwn ndeu, ndaej hawj nungzdu veisonh lai gwd, bangcoh siuvaq caeuq supsou, hawj vunz lai gwn ndaej doxgaiq. Meiq hanhhaed sigin gig ak, yaepseiz couh ndaej gajdai buzdauzgiuzgin ok nong daengj nengzbingh. Doiq yawhfuengz sienghanz、dungxsiq daengj binghcienzlah conghsaej miz cozyung. Seizhah vunz yungzheih naetnaiq、youq mbouj cwxcaih, lai gwn di meiq he, naetnaiq gig vaiq couh siu bae, cinglig cukgaeuq.

2、Byaekheu Ceiq Ndei——Byaek Feihhaemz

Seizhah mbwn ndat youh mbaeq lai, ciengz hawj vunz gamjdaengz naiqnuek mboujmiz rengz、aek mwnh、gyaeuj ngunh、mbouj ngah gwn doxgaiq、ndang byom. Gwn di byaek feihhaemz ndeu daih miz ndeicawq. Cunghyih nyinhnaeuz, ndang vunz mbouj sangj dwg aenvih mbwn ndat mbaeq lai, gawq sieng heiqmak youh hawj dungx naiq. Byaek feihhaemz ndaej doenggvaq bouj heiq hen mak、 cangq dungx nyinh sauj cozyung, dabdaengz goengnaengz aenndang doxdaengh. Yienhdaih gohyoz yenzgiu hix cwngmingz, gij swngh- vuzgenj、anhgihsonh、feihhaemz、veizswnghsu caeuq gvangvuzciz ndaw byaek feihhaemz hamz miz gij goengnaengz siu hwngq、doiq ndat、cawz simfanz、daezsaenz caeuq cangq dungx haenx. Lwghaemz、byaekmiek、byaekohswnj、byaek- ginzcai、golinzgaeq、cehmbu、beghab daengj, ndaej senj gwn di.

3、Dangbyaek Ceiq Ndei——Dangmakyungz

Seizhah lai gwn dangmakyungz gawq ndaej supaeu yangjliu, youh ndaej bouj raemx. Gwn dangmak- yungz ndaej dingj cenzlezsen baenz aiz caeuq baujhoh simdaeuz, ceiq hab bouxsai gwn.

4、Nohgwn Ceiq Ndei——Nohbit

Nohbit mboujdanh hamz miz danbwzciz daengj yangjliu, lij ndaej fuengz bingh yw bingh dem. Aenvih duzbit dwg youq ndaw raemx ra gwn, singq caepliengz, daegbied hab boux baenz ndaw ndat、boux hwnjhuj gwn. Nohbit caeuq haeuxcid cawj cuk gwn, ndaej ciengx dungx、bouj lwed、seng raemx, doiq boux baenzbingh ngamq ndei ndanghaw daih miz ndeicawq; nohbit caeuq haijdai aeuq gwn, ndaej hawj sailwed bienq unq, gyangqdaemq hezyaz, ndaej fuengzceih doenghmeg giet ndongj、hezyaz sang、binghsim- daeuz; nohbit caeuq rangz aeuq gwn, ndaej yw baezhangx ok lwed.

5、Yinjliu Ceiq Ndei——Caz Ndat

Seizhah liz mbouj hai yinjliu, ceiq ndei yinjliu bingq mbouj dwg gak cungj yinjliu gyoet, hix mbouj dwg gahfeih roxnaeuz laeujbizciuj, dauqfanj dwg caz ndat. Ndaw mbawcaz hamz miz gyaz doxgaiq, gawq ndaej gaij hozhawq youh ndaej siu naet. Caz ndat gyangq raeuj naengzlig beij gak cungj yinjliu gyoet ndei ndaej lai, baiz youq seizhah siu hwngq vih daih’it.

6、Yindung Ceiq Ndei——Youzraemx

Youzraemx mboujdanh ndaej duenhlienh fwngz、ga、hwet、dungx, caemhcaiq doiq simdaeuz、aen’uk、bwt、daep, daegbied dwg doiq sailwed miz ik, deng haenh guh “dijcauh sailwed”.