“Lwgndai mwngz! Bae gizlawz youz la? Mwngz mbouj rox mbwn laep ha.” Daxboh ndatheiq dwk ndaq naeuz, yaengx diuz faexbien raezrangrang yaek fad roengzdaeuj. Daxmeh lienzmuengz buet gvaqdaeuj, gaem faexbien gouz naeuz:“Boh de, gaej ndatheiq lo. Vah mbouj gangj mbouj rox, leix mbouj naeuz mbouj mingz.”

Dingqnyi daxmeh yienghneix gangj, daxboh cij menhmenh caem roengzdaeuj. De byaij daengz gyang dingranz naengh roengzdaeuj, naeuz: “Gvih roengzdaeuj. Caiq gangjgangj cuengqhag le, mwngz vihmaz mbouj anqseiz ma ranz, bae gizlawz youz, daengz mbwn laep cix mbouj roxnyinh dauqma?”

“Gou……gou……gou caeuq dahnuengx ranznden caez bae ndaw daemz gaeb bya.” Gou itmienh daej itmienh naeuz, “gaeb bya mizyinx lai, couh lumz dauqma, gou loek lo, daxboh. Baezlaeng gou mbouj yienghneix guh lo……” Gou lienzlienz nyinh loek naeuz.

Daxmeh yawjraen gou gangj ndaej lauxsaed, sim’in dwk lumhlumh aen gyaeuj gou, gamz raemxda naeuz: “Dahlwg dijbauj gou ha, daxboh mbouj dwg mbouj gangj leix, hix mbouj dwg mbouj miz saeh gag fatheiq. Danhseih, mwngz siengj gvaq lwi, dou ngoenzngoenz buekmingh guhhong, roengzrengz canh cienz, siengj hawj ranz raeuz saedceij haemq ndei, byawz siengj daengz banhaemh ma ranz caengz ndaej yietnaiq couh ganj ok dou dauqcawq ra mwngz, simdaeuz ndukgyuggyug. Danghnaeuz mwngz caen ok gijmaz loeklak, dou ciuh neix baenzlawz gvaq ciuh? Lwg ha, bohmeh sim’in ha, mwngz rox mbouj rox.”

Gou dingq le raemxda doek- byoegbyoeg, ndawsim naekgywg- gywg, “hojlienz aen sim gyoengq bohmeh.” Gou yied siengj yied siengsim, ndawsim gag gietdingh baezlaeng mbouj caiq hawj bohmeh gvaqsim lo.

Seizneix, baez yawjraen diuz faexbien cuengq youq gwnz ding- dangz, gij vah daxboh couh lumj fagcim nei camz dwk gou nanzsouh raixcaix, yaenq haeuj ndaw ukgyaeuj gou, caiq hix lumz mbouj ndaej lo.

(指导老师：莫忆术)