Gveihcwz dwg gij cidu roxnaeuz canghcwngz mizgven bu’mwnz ceiqdingh, gyoengq- vunz aeu doengzcaez ciuqsouj. Gou roxnyinh gveihcwz aeu ciuqsouj, gangj daengz gveihcwz hawj gou siengj daengz gienh saeh nanzlumz ndeu.

Miz ngoenz ndeu banringz, gou cingq youq ndaw gyausiz sij cozyez. Sawqmwh gou gamj- daengz dungxiek raixcaix, couh siengj daengz wnggai gwnngaiz lo, yienghneix gou couh sikhaek buet haeuj sizdangz bae, daengz gizhaenx baez yawj, gijvunz baizdui gwnngaiz caen lai ha, couh lumj duzlungz nei raez- rangrang. Neix baenzlawz guh ha? “Danghnaeuz gou ndaej baiz youq baihnaj couh ndei lo, couh naengz sikhaek ndaej gwnngaiz.” Ndawsim gou siengj. Mwh gou simgip seiz, dingq daengz gij sing heuh gou, gou baez yawj, youq ndaw vunzlai yawjraen boux vunzsug ndeu, neix mbouj dwg baengzyoux ndei gou Siujfangh ma? Gou angq dwk naeuz: Mwngz baizdui youq baihnaj caen ndei ha!” Siujfangh couh yaep da heuh gou ndwn youq baihnaj de, ndawsim gou angq raixcaix. Seizneix gou gamjdaengz lwgda gyoengqvunz cungj yawj coh gou, doengzseiz henz rwz gou yiengj hwnj gijvah lauxsae “bae sizdangz gwnngaiz aeu baizdui ciuqsouj gijliz yozyau”, youh yawjyawj hungzlingjginh hoengzyanyan najaek, gou najmong raixcaix, simsiengj: Gou dwg sausenh- duiyenz, wnggai ciuqsouj gijliz yozyau. Deng! Itdingh aeu ciuqsouj! Yienghneix gou couh buet daengz “rieng duzlungz” bae baizdui, Siujfangh gamjdaengz geizheih dangqmaz. Gvaq liux gig nanz, gou dauqdaej ndaej gwn ngaiz lo. Yienznaeuz gou baizdui gig nanz cij ndaej gwn ngaiz, hoeng ndawsim gou gig angq, aenvih gou ciuqsouj gijliz yozyau lo.

Gienh saeh neix hawj gou roxdaengz gveihcwz gig youqgaenj hix gig gyaeundei, gveihcwz hawj ciuhvunz gou hwnj dangz goq cungyauq ndeu, neix dwg yungh ngaenz cungj cawx mbouj ndaej bw.(指导老师:覃玉往)