Ranz gou ciengx bang bitlwg ndeu, mizmbangj daengx ndang hausaksak, lumj daenj geu buhhau ndeu；mizmbangj daengx ndang saek mong, lumj daenj buh sihcangh nei, caen gyaeundei.

Moix ngoenz banhaet, gou cungj gueng bit. Mwh gyoengqde doeng yawj sae yawj, youq gwnz diegnywj doeng sip sae sip seiz, gou rox gyoengqde dungxiek lo, couh doiq gyoengqde hemq:“Bitlwg, gwn haeuxromh lo!” Hemq sat, yaengx aen bathaeux hwnjdaeuj youh cuengq roengzdaeuj.

Gyoengq bitlwg yawjraen le, bibuengq caekhaex byaij gvaqdaeuj, iet hoz heuhgaga. Gyoengqde sawqmwq yawjraen ndaw bat miz doxgaiq gwn, couh haenqrengz buet daeuj, doxciengj gwn hwnjdaeuj.

Gwn imq le, bitlwg couh bungbung diuq roengz ndaw daemz henz ranz bae angq dajcaemz, mizmbangj ndonj roengz ndaw raemx le, caiq ngiengx gyaeuj boq raemx okdaeuj, lumj riengx bak nei, miz mbangj cwxcaih dwk youz bae youz dauq, lij mizmbangj cingq nyinhcaen dwk swiq gij bwn gwnz ndang.

Gou youq gwnz hamq yawj gyoengqde, song fwngz vad dwk, lumj- baenz cihgeij hix dwg duzbit lo.

（指导老师：潘金妹）