Seizcou daengz lo, mbanjranz raeuz lengqlengq gve rang mak diemz, gij vunz bouxboux angqfwdfwd, lajmbanj gingjsaek hix bienq ndaej engqgya gyaeundei.

Mbwn baenzneix sang, baenzneix lamz. Gwnzmbwn lamzsumsum haenx miz baenz duj baenz duj fwjhau mbin dwk, miz- mbangj lumj yiengzlwg cingq vaiqvued gwnnywj, mizmbangj lumj duz douqiq saetsaet diuqiuq guh’angq.

Gwnz ndoi, mbaw raeu hoengzfwgfwg lumj mienhmienh geizhoengz; mbaw ngaenzgingq lumj benq beiz gyaeundei. Raq rumz ndeu ci daeuj, mbaw faex loenq youq gyangmbwn mbin bae mbin dauq. Ndaw gyangdoengh, doenghnaz lumj benq haij saek- gim, raq rumzcou ndeu ci daeuj, fan hwnj baenz benq baenz benq haeuxlangh. Gomegmax lumj dahsau iq najmong ndeu， naj hoengzfoedfoed ngaem gyaeuj roengzdaeuj; haeuxyangz loh gij heuj saek gim de. Ndaw suen mak, baenz roix baenz roix makit venj youq gwnz gaq, miz hoengz、aeuj、gyaemq、heu, haj saek cib yiengh, lumj aen youh aen cawngaenz ndongqliklik. Gij makgam hoengzyan haenx, sam aen guh gyoengh, haj aen guh nyup, gyaeuj dep gyaeuj, naj doiq naj, lumj baenz youq gizhaenx gangj vahsebrwz, gij doxgaiq ceiq hawj vunz ngah daengz maiz rih haenx, dwg gij makleiz henj- rwgrwg haenx, henjgim henjgim lumj aen youh aen daengloengz, dwggyaez raixcaix.

Mbanjranz raeuz gingjsaek seizcou geijlai gyaeundei ha, gou gyaez seizcou mbanjranz！

（指导老师：潘金妹）