Ngoenzhaenx, ban dou youh miz boux lauxsae moq he daeuj lo, dwg Lij lauxsae.

Lij lauxsae baez byaij haeuj gyausiz, couh riunyumnyum doiq daengx ban doengzhag naeuz: “Gou singq Lij, ngoenzneix hainduj caeuq daihgya itheij hag yijvwnz, dwg boux mehmbwk……” Vah de caengz gangj sat, gyoengq doengzhag cungj “hu……hu……” riu hwnjdaeuj, miz mbangj caegcaeg singsaeq lwnh:“Boux vunz cungj ndwn youq gizneix, byawz mbouj rox mwngz dwg mehmbwk. Caen duet vaq ok roet——doyawz.”

“Youh boux mehmbwk yakdoeg ndeu daeuj son raeuz, ai, caen boih- seiz, mingh gou baenzlawz yienghneix haemz lai ne?” Gou nyaenx mbouj ndaej hix caeuq gyoengq doengzhag lwnh hwnjdaeuj.

“Danhdanh, cingj mwngz ndwn hwnjdaeuj, gangjgangj ba, mwngz dwg baenzlawz duenhdingh naeuz gou boux lauxsae mehmbwk neix yakdoeg ne? Gou gig siengj dingq mwngz gangjgangj yienzaen, ndaej lwi?” Mbouj rox seizlawz, lauxsae gaenq byaij daengz henz daiz gou riu dwk naeuz. Gou simvueng dangqmaz, seizneix caen siengj ndonj haeuj congh namh bae.

Gou menhmenh ndwn hwnjdaeuj, cijguenj ngaem gyaeuj yawj gwnz deihbanj, mbouj gamj ngiengx gyaeuj yawj Lij lauxsae. Gizsaed gou mbouj rox naj Lij lauxsae, cij dwg seizneix dingq daihgya lwnh couh luenh gangj hane. Gou nyinhnaeuz gaxgonq boux lauxsae mehmbwk son dou haenx yakdoeg, ngoenzneix hix dwg lauxsae mehmbwk, wnggai lumj boux gaxgonq nei yak raixcaix. Gou sing baenzneix saeq, Lij lauxsae lij dingqnyi. Gou baenzlawz hoizdap lauxsae ne?

“Mbouj youqgaenj, gangj saed vah, lauxsae mbouj gvaiq mwngz.” Lij lauxsae youh coi naeuz.

Gou ndwnj gaemz heiq daengz laj daej dungx, najmong dwk saeqsing naeuz:“Gou cix dwg luenh gangj, lauxsae, gou loek lo, doiq mbouj hwnj, cingj yienzliengh gou.”

“Dahlwg ha, lauxsae mbouj dwg bouxsien, lauxsae hix miz gezdenj. Danhseih, mbouj caengz diucaz liujgaij couh duenhdingh, siujsim ‘bingh daj bak haeuj, hux daj bak ok’ha!” Lauxsae unqswnh dwk naeuz.

Gangj sat le, Lij lauxsae cienq ndang byaij coh gyangjdaiz bae, gou naengh youq gwnz daengq ndawsim nanzsouh raixcaix.

(指导老师：莫忆术)