Mwngz ngoenznaengz gyaez guh gijmaz yindung ne? Gou bingzseiz ceiq gyaez dwk yijmauzgiuz.

Cij aeu mbwnrengx, moix haemh gwn caeuz gvaq, gou cungj aeu caeuq daxboh itheij youq gyanghongh dwk yijmauz- giuz. Ngamq dwk seiz, gou lienz giuz hix mbouj rox fat, engq mbouj rox ciep giuz lo. Yijmauzgiuz lumj caeuq gou doiq dig ityiengh, gou ngamq aeu ciep, de couh daj henz banj gou mbin gvaqbae, baenzlawz fatgiuz, aen giuz cungj fat mbouj ndaej gvaqbae. Hai, yawjraen bouxwnq dwk giuz dwk ndaej gig sang, cungj mbouj feiq rengz, hoeng daengz gou baenzlawz couh baenz nanz ne? Gou caen miz di simcit, caen mbouj siengj dwkgiuz lo……Daxboh lumj yawj ndaej ok aen sim gou couh itmienh buenx gou dwk giuz, itmienh bang gou dajheiq naeuz: “Ngoenzneix mwngz cinbu haujlai lo, cij aeu mizsim dwk, gangj mbouj dingh lij ndaej baenz seiqgyaiq daih’it ne!”

Daxboh naihsim son gou fatgiuz, ciep giuz, gou miz saenqsim lo. Ciemhciemh dwk, gou gyaez hwnj dwk yijmauzgiuz lo, saek seiz lij ndaej hingz daxboh ne. Hoeng, gou ndaw sim gag rox, neix dwg daxboh daegdaengq saw hawj gou. Gou caegcaeg roengz gietsim：Gou itdingh aeu roengzrengz, baenz boux dwk yijmauzgiuz caencingq ak ndeu.

Doenggvaq dwk yijmauz- giuz, gou mboujdanh ndaej lienh ndangdaej, lij rox aen dauhleix ndeu：Gwnz biengz mbouj miz saeh nanz, cij aeu mwngz haengj bae guh.

（指导老师：覃珍团）