Seizhah daeggo laeglemx dwk byaij deuz lo, seizcou dahsau naengh maxci angqvauvau dwk daeujdaengz lo.

Seizcou dahsau byaij daengz ndaw ndoengfaex, mbaw goraeu rongz geu buh hoengzfwgfwg, mbawraeu youq gyangmbwn diuqfoux fifi, mbouj yaephe couh diuq daengz lajdin gofaex daxmeh lo. Siujbaengzyoux youq gwnz mbawraeu unqnemnem haenx fan dingjdaeuj, guh’angq……

Seizcou dahsau byaij daengz henz dah, go faexliux daenj hwnj geu buh henjgim, ciuq gingq roi bwngyaeuj ne!

Seizcou dahsau daeujdaengz suenmak, yawj ha！Makgyoij vad aenruz iq gungjngetnget gvaqdaeuj lo; makndae naengh aen giceh luenzlulu hai daeuj lo; mak siglouz itmienh buet itmienh riu dwk, baeg daengz bak aj lo; makleiz itdingh dwg daj gyanghwnz ganj daeuj, aenvih gwnz ndang de lij nem miz saekhenj ronghndwen; mak bingzgoj couh lumj dahsau lau nyoj nei, buet ndaej daengx ndang fat ndat, daengx naj hoengzfwtfwt; makit hix vuenh hwnj buh saekaeuj daeuj camgya seizcou dahsau aen hoih neix lo, caen nauhyied ha!

Seizcou dahsau daeuj daengz gyang doenghnaz，yawj！Haeuxyangz dahnuengx sim’angq lai lo, de daeg- daengq vuenh geu buh henjgim rwgrwg, angqcoux seizcou dahsau daeujdaengz. Yo！Megmax daeggo baez raen seizcou dahsau daeujdaengz, couh lumj gwn laeuj nguiz ityiengh, ngiengx naj hoengzndaem, ngauz gyaeuj ciengqgo：“Dahnuengx mwngz mbeihung byaij bae naj……” Naz- haeux baihhaenx, langhhaeux fanfog, dauqcawq nyouq daengz heiqrang fungsou. Raq rumzcou ci daeuj, nungzminz daxau daxheiz daeuj gvej haeux lo, gyoengq lwgnyez youq ndaw rumz fungsou diuq ha hemq ha……

A! Seizcou caen gyaeundei, gou gyaez seizcou!

（指导老师：覃珍团）