De lij naeuz, gij gihgvan cigsug ndaw gih roxnaeuz cigsug ndaw si haenx cungj aeu siumied diegfwz, guh gij dieg neix baenz suenmak bae, roxnaeuz yungh daeuj ndaem gofaex funggingj. Danghnaeuz song hangh neix cungj mbouj habsim nei, couh bu diegnywjbingz. Yungh geij bi seizgan, youq ndaw si、 gyanghongh, siumied go’nywj nyaengqsaengsaeng dingz yienhsiengq neix.

Dahyunghgyangh daiq daeuj hwngvuengh caeuq vuenyungz hawj Si Namzningz, caemh daiq daeuj cainanh. Doenghbaez, baez fat raemxrongz, vihraemx Yunghgyangh mauhgvaq 69 maex seiz, gij dieg youq daemq ndawsingz haenx sikhaek deng dumh. Caizliuh lizsij geiq miz, daj bi 1908 daengz bi 1949, 41 bi neix daeuj, couh miz 14 baez raemxrongz vihraemx mauhgvaq 75 maex, dumh doh aensingz neix.

Cungguek moq laebbaenz le, baez raemxrongz ceiq laux Si Namzningz dwg youq bi 1968 ndwen 8 fatseng, vihraemx sang daengz 76.39 maex. Daengx si 195 diuz gai miz 176 diuz deng dumh, dieghenzsingz 6 fanh moux naz caeuq diegbyaek deng dumh doh, sonjsaet haenq lai.

Seizhaenx, Veiz Gozcingh dwg boux vunzgaemhong Cujsaeq Bwhguh Veijyenzvei Gwzming Guengjsae, lij youq Baekging camgya aen Banhagsib Cujciz Vunzlai Song Baij Guengjsae cunghyangh banh haenx,, gaijgez song baij daih lienzhab caeuq laebbaenz Veijyenzvei Gwzming Guengjsae gij vwndiz neix. Namzningz vujdou coemh le haujlai gai, youh fat baez raemxrongz noix raen neix, hawj haujlai vunzcai deng louzlangh, Veiz Gozcingh sim gig in dwk naeuz: “Caendwg cainah a!”

Veijyenvei Gwzming Swcigih laebbaenz le, Veiz Gozcingh dwg boux cujyin, de gig gvansim soujfuj re raemxrongz. De ra boux cujyin Veijyenzvei Gwzming Si Namzningz Hanz Sifuz、fucujyin Siuh Hanz daengj vunz daeuj doxyaeng, cingj gyoengqde ngeixnaemj yaenglwnh gonq, daezok yigen, liuxle cij bauq hawj swcigih guh ngeixyaeng gietdingh.(caengz sat)