Sai：Haetneix ganj hawbit

Ndit caengz ok byaibya

Ngam byaij daengz roenca

Roeb dahnuengx bakloh

Sau：Beix bae haw guhmaz

Ra lwgsau gangjgoj

Cawx saek geubuh moq

Soengq dahgoj cangndang

Sai：Beix caengz miz sauyoux

Cibgouj lai sam bi

Ndaw ranz mbouj baenzmiz

Lij gai rengz ra haeux

Sau：Laek cang gungz heuh hoj

Ranzlaeuz goj daengj baenz

Cienz mbouj miz geij faen

Baenzlawz gangj ndaej gvaq

Sai：Beix senq bae Guengjdoeng

Roengz cangj bae dizlienh

Ngoenz guh geij cib gienh

Lwedhanh bienq baenz ngaenz

Sau：Nuengx youq rauz ndaemnaz

Leh deih ma ndaem byaek

Yienznaeuz dawz rap naek

Mbouj miz saek yiengh ndwi

Sai：Nuengx dwg boux canghhong

Song fwngz gvai youh gaenx

Haeuj cangj guh ndaej ngaenz

Geij bi baenz vunzfouq

Sau：Haw hung caengz bae gvaq

Baenzlawz ra ndaej hong

Beix daz nuengx baenz song

Ra hong cij ndaej ngaih

Sai：Beix gaisau haeuj cangj

Mbouj gangj maz diuzgen

Song raeuz sim doxlienh

Cien bi cungj caemh youq

Sau：Daegbeix cingzeiq naek

Nuengx goj yaek caemh ranz

Beix cam nuengx couh han

Fanh bi raeuz doxgyaez

Hab：Bouxcoz vasim hai

Byai faex venj rim mak

Seizcou aenaen fag

Haeuj bak amqamq diemz