Daengngoenz lumj aen giuzfeiz nei lwenqyapyap venj youq gwnz- mbwn, nditlwenq dwk bouxvunz yaek hai mbouj ndaej da bae, aeng dwk bouxvunz yaek diemjcaw mbouj ndaej.

Gizneix dwg aen dieg hwnj laeuz moq ndeu, gyoengq vunzhong youq laj ndit guhhong bouxboux hanh dumz ndang liux.

Seizneix, aen ciaudiz ndeu youq laj laeuz lij caengz guh baenz haenx dingz roengzdaeuj, mbouj yungh gangj, gyoengq bouxguhhong haenx couh rox dwg boux hongdaeuz daengz lo, ndaek neix ngoenz ndeu song ngoenz couh daeuj gunghdi gamhong baez ndeu, gyoengq bouxguhhong raen lai le couh sibgven lo. Danghnaeuz de dan yawj mbouj youqgaenj, ceiq dwgcaengz dwg aenbak de, aenbak de baez doengh, mbouj dwg ndaq vunz couh dwg gyaep vunz guhhong vaiq di. Couh lumj ngoenzlwenz nei, aenbak de baez aj, diuz ling aeu mingh vunz ndeu couh loh okdaeuj:Baihgwnz mingling youq aen byai ndwen neix gaxgonq guhsat aen gunghcwngz neix, mbouj miz couh gaeu cienzhong.

W! Byai ndwen neix guhsat? Neix dwg boux ndeu guh gij hong song boux haenx bw, caendwg ndwn dwk gangj vah hwet mbouj in ha.

Seizneix, hongdaeuz ndonj ok ci daeuj, yungh fwngzgvaz youq najbyak de dangj ndit, yiengq gunghdi yawj bae, ciepdwk song fwngz guh baenz aen lahbah ndeu yiengq gunghdi hemq naeuz:“Gyoengq beixnuengx, gij cindu aen gunghcwngz sou ndaej daengz lingjdauj haenh lo, yaep dem lingjdauj yaek daeuj gunghdi camnai gyoengq- sou, raeuz bouxboux aeu cingsaenz gvaekgvaek、ndatcingz coux lingj- dauj ……”

Daihgya mbouj miz byawz dapwngq de, lumj baenz mbouj dingqnyi nei, cij nyaengq guhhong.

Yaek daengz banringz cib’it diemjcueng seiz, haj aen ciiq aen gaen aen hai haeuj gunghdi daeuj, gunghswh laujcungj caeuq hajboux lingjdauj laebdaeb roengz ci, hong- daeuz baez raen gyoengqde roengz ci, sikhaek buet bae caeuq goengde gaemfwngz, liux le yiengq gwnz gunghdi hemq naeuz: Gyoengq beix- nuengx, yietnaiq yaep ndeu, lingjdauj daeuj yawj sou lo, vaiq di comz daengz giz dieghoengq neix daeuj.

Geij cib bouxguhhong haenx laebdaeb comz daengz giz haenx, hongdaeuz anbaiz gyoengqde ndwn baenz seiq baiz.

“Gyoengq dungzci, sou sin’hoj lo, sou dwg boux gensez ndawsingz, ndawsingz gensez liz mbouj ndaej gyoengqsou……sou aeu guh ndei gij hong ancienz caeuq fuengz ndit ha.” Laujcungj ndatcingz dwk gangj vah, baez gangj sat, hongdaeuz daiqdaeuz dop fwngz, sat le, gyoengq lingjdauj hawj gyoengq bouxguhhong boux fat bingz raemx ndeu caeuq aen mauhdiemx ndeu.

Seizneix, boux ceiq nyaengq haenx dwg boux ingjsiengq, de aeu dawz gij ciengzmienh lingjdauj camnai gunghyinz neix ingj roengzdaeuj.

Seizhaenx mbwn gvengq ndit haenq, yaep yet, gyoengq lingjdauj deng ndit coemh dwk hanh lae hanh roenx, bouxboux aen naj hoengz- fwdfwd.

Hongdaeuz raen le, gaenjgip daihsing dwk naeuz:“Gou daibyauj gunghyinz docih gyoengq lingjdauj, gyoengqsou sin’hoj lo, ndit aeng lai, sou dauqbae gonq, gou lawh sou fat laex ba.”

Coenzvah neix gangj ndaej gig habseiz, gyoengq lingjdauj dingq le gipmuengz ndonj haeuj ndawci bae.Boux lingjdauj ndeu caeuq hongdaeuz laeglemx gangj geij coenz, couh doiq gyoengq lingjdauj naeuz:“Raeuz bae Laeuzsien ietnaiq ba!”.

Gyoengq lingjdauj byaijdeuz le, hongdaeuz daihsing hemq naeuz: “Moix boux ndaej bingz raemx ndeu caeuq aen mauhdiemx ndeu, haxbaenh byawz caengz ndaej couh gag daeuj lingx.”

“Baenzneix lungzcung daeuj fat laex neix, yaeuh lwgnyez ha?”

“Raeuz dwg daenj mauhdiemx ndei roxnaeuz daenj mauh ganghgvei ndei ne?”

……

Gyoengq vunzhong byawz gangj maz cungj miz, mbouj dawz gij doxgaiq haeuj sim caeuq gij vah hongdaeuz haeuj rwz, gak boux gag dauqbae guhhong swhgeij.

“Hw——” Hongdaeuz riu’nyaen sing ndeu, sim naemj: “Gyaez aeu couh aeu, mbouj gyaez dang’viz, neix hix dwg gij cienz sou cawx daeuj.”

Gvaq le sam ngoenz, dangdieg bauqceij daeng fuk doz sinhvwnz ndeu, fukdoz gej naeuz: XXX gencuz gunghswh lingjdauj mauh ndit roengz gunghdi bae camnai gyoengq gunghyinz, souh ndaej daengxcungq haenhndei.

Gyoengq lingjdauj yawj bauqceij le, riunyumnyum, ngaekngaek gyaeuj.Gyoengq vunzhong yawj le mbouj dangq saeh ndeu. Cijmiz hongdaeuz sijsaeq bae yawj: Gyoengq lingjdauj naeng mienz noh oiq haenx,caeuq gyoengq bouxhong naeng co naj ndaem haenx, baez doxbeij, caen doxca lumj gwnzmbwn lajdeih nei.

Hongdaeuz yawj dwk fukdoz gwnz bauqceij, mbouj gangj saek coenz vah, muengzyaengyaeng byaij coh Laeuzsien bae.