Miz bang doenghduz iq ndeu, moix ngoenz cungj guhhong mbouj dingz, daihgya cungj haenh gyoengqde dwg bouxgaenx, gyoengqde couh dwg duzrwi iq dwggyaez.

Duzrwi iq aen gyaeuj luenzlulu, lwgda ndaemndetndet, cienqloekloek, aen bak diemzsisi, ndang reuxredred, din fwngz saeq youh raez, ndaw diuzrieng cang miz fag cim iqetet. Mwngz geij yawj fag cim neix iq, de dwg fag cim miz doeg, danghnaeuz duzrwi iq huj le, camz mwngz baez ndeu, mwngz couh in ndaej hemqyoyo lo!

Baez daengz seiz mbwn raeuj va hai, mwngz couh ciengzciengz yawjraen haujlai duzrwi iq mbin bae mbin dauq, yaephe mbin daengz duj va neix, yaep he mbin daengz duj va haenx. Duzrwi iq gaenx cungj dwg angqvauvau dwk hemq “vwngvwng”, daengx ngoenz diuq bae foux dauq, mbouj yousim saek di. Daj seizcin itcig muengz daengz seizcou, duzrwi iq cupsou vafaenj cungj mbouj dingz roengzdaeuj gvaq. Seizdoeng daengz lo, rumzbaek cihuhu, raeuz okdou bae yawj, mbouj raen ingjngaeuz saek duz rwi iq lo. O, yenzlaiz duzrwi iq hix rox gvaq doeng ha！

Diengzrwi diemzsisi, rangfwdfwd, mboujdanh ndeigwn, lij ndaej guh yw dem.

Duzrwi iq, mwngz sinsin hojhoj bae aeu vafaenj, cungj dwg vih bouxvunz cauh diengz ha, mwngz caen hungmbwk ha！

（指导老师：覃珍团）