珍惜生命 安全从我做起

——安全教育心得体会

It. Gyauhdungh ancienz

Va loenq le, ndaej caiq hai, nywj reuq le ndaej caiq did. Hoeng sengmingh vut le, lij ndaej lix dauq dem lwi? Sengmingh mboujmiz caijbaiz, gyoengqraeuz yaek rox insik sengmingh. Ancienz, dwg aen vwndiz gyoengqvunz gig yawjnaek ndeu. Youq hagdangz, lauxsae ciengzciengz gangj “ancienz daih’it”, lauxsae gangj ceiq lai couh dwg ancienz vwndiz.

Hoeng haujlai vunz dauq nyinhnaeuz lauxsae yousim lai lo, yienghneix gyoengqde couh mbouj yawjnaek ancienz vwndiz, doeklaeng couh deng oksaeh lo. Doiq gij ancienz yienhsiengq neix, hagdangz raeuz guh le haujlai gyauyuz, iugouz gak ban moix couh hai banhoih seiz gangj ancienz, sawj doengzhag yawjnaek ancienz, mienx oksaeh. Youq mbat ancienz gyauyuz hozdung neix gou gamjsouh gig laeg.

Gaengawq mizgven baudauj, cienz seiqgyaiq moix 6 miux cung couh miz boux vunz ndeu aenvih cehho dai bae, guek raeuz youq cienz seiqgyaiq fatseng cehho ceiq youqgaenj, moix ngoenz mbouj rox miz geijlai vunz vut mingh youq laj loekci, sawj aen gya siksanq. Miz mbangj vunz vihliux fuengbienh bonjfaenh mbouj dawz ancienz haeujrwz: Hagseng naengh danci bingzbaiz byaij、dap naengh gij ci mbouj miz baiz miz cwng、cung daenghoengz、doq naengh danci doq gangliengj……Doeklaeng oksaeh lo. Yienghneix gyoengqraeuz aeu cunhsouj gyauhdungh gveihcwz, guh bouxvunz vwnzmingz ndeu.

Ngeih. Youzraemx ancienz

Youzraemx dwg cungj yindung doiq gengangh mizik ndeu, hoeng mizmbangj vunz youq ndaw raemx guh’angq、 duenghrag, yienghneix couh yungzheih deng mued dai. Geij bi neix daeuj, miz mbouj noix hagseng gag bae youzraemx, ok yungyiemj le, gyoengq doengzhag bae gouq, doek- laeng cungj ngaiz mued dai lo. Ndigah youzraemx yaek aeu miz bohmeh daiqlingx, bae gizdieg aencienz cij ndaej youz. Danghnaeuz fatyienh miz vunz doek raemx, mbouj ndaej vueng, mbouj ndaej luenh roengz raemx bae gouq vunz, wnggai hawj vunzhung daeuj gouq. Caiqlix mbouj ndaej ngamq guh yindung haenq le couh youzraemx, mienx ndaej ganjmau、cougaen.

Sam.Gijgwn ancienz

Miz sinhvwnz baudauj naeuz gwnz haw miz canghdoz canghbuenq vihliux canhcienz mbouj goq gyoengqvunz ndangdaej gengangh, gai nohnou dai gai huqrwix. Ndigah gyoengqraeuz cawz liux yaek caz gyoengq vunz neix gij fazliz cwzyin, caiqlix yaek gag gangj veiswngh, mbouj cawx noh moudai, mbouj gwn gij doxgaiq caep、seng, mbouj youq gij dan youzbyaij cawx doxgaiq gwn, mbouj cawx gij canjbinj mbouj sij miz swnghcanj seizgan, swnghcanj gunghcangj caeuq swnghcanj hozgwz- cwng haenx.

Seiq. Siufuengz ancienz

Feizcoemh dwg cungj cainanh gig dwglau ndeu, de mboujdanh duet bae sengmingh gyoengqraeuz, vanzlij sawj ginghci sonjsaet naeklai.

Ndigah gyoengqraeuz aeu haeujsim siufuengz ancienz. Gwnz ndang mbouj ndaej daiq cehfeiz, mbouj ndaej youq henz gij doxgaiq yungzheiz dawzfeiz、bauca haenx diemjfeiz, mbouj aeu feiz daeuj guh’angq. Danghnaeuz deng feizcoemh lo, mbouj ndaej vueng, wnggai yungh sujbaq dimz goemq ndaeng caeuq bak, vaiqdi deuzsanq, mbouj ndaej dam gij ngaenz caeuq doxgaiq dijbauj ndaw ranz. Danghnaeuz feiz mbouq haenq, raeuz ndaej yungh mezhojgi daeuj ndaepfeiz. Caiq le, gyoengqraeuz yaek hag rox fuengfap baenzlawz deuz feizcoemh, yienghneix cijndaej vih baujhoh seng- mingh dued ndaej seizgan.

Haj. Fuengz duzbinj

Vayinghsuz gyaeundei, hoeng de dwg gij yienzliuh cauh duzbinj. Guek raeuz gyoengq vunz mbouj siujsim gwn duzbinj haenx, dingzlai dwg gyoengq bouxnomj mbouj mizsim fuengz duzbinj haenx. Bouxvunz gwn duzbinj le couh bienq ndaej moengjdoengj, ukgyaeuj mbouj dingq cijveih. Danghnaeuz ndaw ranz miz vunz gwn duzbinj cienz gya couh deng sikdinz sanqdanh lo. Yienghneix duzbinj mboujdanh doeghaih bouxvunz, vanzlij hawj sevei daiq daeuj mbouj andingh. Duzbinj yinx daeuj haujlai hozdung famhcoih, nyauxluenh sevei ci’anh. Gou vih gyoengq vunz gwn duzbinj haenx gamjdaengz sim’in, hix caengz gyoengq buenq duzbinj、cauh duzbinj haenx. Gyoengqraeuz cungh- yozswngh, aeu cunhsouj fazliz caeuq cidu hagdangz, danghnaeuz fatyienh miz vunz gwn duzbinj、buenq duzbinj aeu gibseiz bauq hawj bohmeh、lauxsae roxnaeuz gungh’anh gihgvanh.

Gyoengqraeuz aeu seizseiz dawz haeujsim. Sengmingh geijlai gyaeundei、dijbauj, gyoengqraeuz cingfwngz hwnjdaeuj hawj sengmingh engq gyaeu- ndei!（指导老师：林锦凤 陆全耀）