Daegnuengx gou bi neix ndaej 7 bi lo. Bingzciengz de gig gyaez daenj geu buh saekhau, geu vaq saeklamz. Aen giuzndaeng de gig sang, doiq lwgda gig hung, gig miz saenz.

Daegnuengx gig gyaez yawj densi, cijaeu mbouj bae hagdangz, de cungj dwg yawj densi daengz gyanghaemh 10 diemj cung cij hwnj congz bae ninz. Miz baez ndeu, de siengj yawj densi, ngamq deng densi vaih lo, de couh hemqrangrang, nauh dwk daengx ranz vunz cungj mbouj ndaej ansim. Ngoenz daihngeih, daxboh sikhaek dawz densi bae coih ma.

Daegnuengx lij gig dam gwn. Miz baez ndeu, daxbuz cawx di binghgizlinz dauqma, daegnuengx fwngz hix mbouj swiq, couh fwngz swix gaem aen gwn, fwngz gvaz youh gaem aen he, mbouj geij nanz couh gwn bae roek aen binghgizlinz lo. Doeklaeng, haemhhaenx de hwnj veiswnghgenh seiq baez, lij ndaq daxbuz mbouj wnggai hawj de gwn baenz lai ne!

Lij miz baez ndeu, gou siengj cang de, couh ra aen hab dangauh cuengq gwnz daizgwnngaiz, baihndaw sij mbawceij he：“Haha！Deng yaeuh loba！Lwgmeuz gvij!” Gou siengj daegnuengx itdingh deng yaeuh. Caen daihraix, mbouj yaephe, daegnuengx daj rog buet ma, de diem din diem fwngz dwk byaij daengz henz daiz, menhmenh gej aen hab, rox deng yaeuh le, de gig hozndat, sikhaek dawz mbawceij sij miz cih haenx ndek youq gwnz deih, lij aeu din roengzrengz daemh geij baez, cij hujdengdeng dwk buet ok dou bae.

Sou yawj, neix couh dwg daegnuengx gou, laeq lwgnyez ak nauh youh dwggyaez ndeu.

（指导老师：覃珍团）