Seiqgyaiq yienghyiengh cungj cingq fazcanj bienqvaq. 20 bi gvaqbae lo, lajmbanj miz gijmaz bienqvaq ne?

Gwn ngaiz gvaq le, gou couh naengh haeuj “Swnghva Bwnhciz”swhgeij, daengz diegcoj yawjyawj bohmeh gou gaenq siengjniemh haujlai nanz haenx. Gwnz loh, caenhguenj ci hai ndaej gig vaiq, gou hix yawj ndaej cingcuj gij doxgaiq seiqhenz: Yenzlaiz gij bya ndoqndangndang haenx bienq baenz ndoengfaex mwncupcup; yenzlaiz ranzngvax daemqdetdet haenx, gaenq deng ranzyouq gak sik gak yiengh haenx dingj lo; yenzlaiz gij roen’iq gumzgumz gamxgamx haenx, gaenq bienqbaenz roen suijniz seuqsatsat, henz loh lij miz lohdaeng gauhgiz ne……Lajmbanj bienqvaq caen hung ha!

Gvaq yaephe, aen ci menhmenh hai haeuj bak mbanj. Doenghnaz song henz loh henjrwgrwg lumj gim nei, rienghaeux ngaemgyaeuj dedded. Seizneix cingq dwg geiqciet dajsou, ndaw naz baenzlawz cij miz souhgozgih mbouj raen saek boux vunz ne? Gou cingq geizheiq, sawqmwh daxboh ndang daenj mingzbaiz sihfuz naj ronghsagsag dwk yamq hung daj ndaw mbanj byaij okdaeuj ciep gou, gou sikhaek lwnh gij ngeizvaeg ndaw sim gou hawj daxboh nyi. De baez riunyumj, daiq gou daeuj daengz aen bangunghsiz henz mbanj, vix gwnz daiz aen dennauj hawj gou yawj. Gou naengh roengzdaeuj baez yawj, va, ndaw naz gijmaz saeh cungj yienj youq ndaw dennauj lo. Lajmbanj saedyienh nungzyez gihgaiva lo! Neix caen dwg daiq saenzgeiz lo!

Gwn haeuxringz le, daxboh daiq gou bae yawj aen suenmak de. Gizneix gingjsaek gyaeundei. Vunzgihgi miz mbangj cingq nyaengq dwk sou mak, miz mbangj cingq dawz baenz swx baenz swx mak riuj daengz henz reih bae, lij miz mbangj cang ci, dauqcawq cungj dwg gingjsiengq nauhyied.

Yienznaeuz ranzmbanj bienqvaq hung daengz gou cengdi nyinh mbouj okdaeuj, hoeng gizneix dauqdaej dwg giz dieg seng gou, gou doiq de itcig baujciz cungj gamjcingz ndiepgyaez he. Gij bienqvaq de lumj cingq gujli gou, itdingh aeu roengzrengz dawz ranzmbanj gensez ndaej engqgya gyaeundei.

（指导老师：潘文清）