Vujmingz Yen Guh Cuengh Gun Song Saw Vah Hagdangz

“Fwngz Cing Fwngz” Gyauyenz Gyauhliuz Hozdung

Vujmingz Yen Lozhih Cin Yinghhih Siujyoz aen haggeiz neix hainduj hai Sawcuengh monz gocwngz neix, vihliux hawj gyoengq lauxsae de vaiqdi rox gij mozsi Cuengh Gun song saw vah sonhag, sam nyied ngeihcib hauh yen gyauyuzgiz gyauyenzsiz youq Vujmingz Yen Senhhu Cin Cunghgyauz Siujyoz guh “fwngz cing fwngz” gyauyenz gyauh- liuz hozdung.

Ngoenzhaenx, Cunghgyauz Siuj- yoz song boux Sawcuengh guzgan lauxsae gak hwnj le dangz Sawcuengh ndeu. Youq gwnz godangz, songde gangj ndaej gig mizyinx, gij vah son- hag gig gyaeu gig diemz, sonhag gocwngz baez baeuh baez baeuh gig cingcuj. Gyoengq doengzhag gaenx yaengxfwngz daez vwndiz dap vwndiz, boux gonq boux laeng doxciengj gangj, lauxsae caeuq doengzhag boiqhab gig ngamj gig ndei, cungfaenh canjsi le gij funghcaij gyoengq Sawcuengh lauxsae sonhag.

Ciep roengzdaeuj song boux son Sawcuengh lauxsae haenx gak gangj swhgeij vih maz yiengh neix son, baenz youq gizlawz, mbouj baenz youq gizlawz; ciepdwk gyoengq lauxsae dingq hwnjdangz haenx caez lwnh swhgeij miz gijmaz gamjsouh, daegbied dwg gyoengq lauxsae Yinghhih Siujyoz gamjsouh gig lai gig laeg, gyoengqde caez naeuz:“Cungj nyinhnaeuz dangz Sawcuengh mbouj miz gijmaz ndei hwnj, siengj mbouj daengz gyoengqde hix hwnj ndaej yienghneix ndei yienghneix mizyinx ha !”

Youq gwnz hozdung neix, yen gyauyuzgiz gyauyenzsiz Sawcuengh gyauyenzyenz Vangz Vwnzyen cujyin naeuz mbat hozdung neix gig miz yiyi, mboujdanh hawj gyoengq lauxsae hag ndaej cihsiz, caemhcaiq hawj Vujmingz Yen Cuengh Gun song saw vah sonhag guh ndaej engq ndei, de maqmuengh cungj hozdung neix lienzdaeb guh roengzbae.

(武鸣县仙湖镇中桥小学 潘芳兰)