Aenvih lwgnyez rengz dingj bingh ca, ndigah ciengzseiz baenz- bingh, lumj baenz feiyenz、dwgliengz daengj. Danghnaeuz lwgnyez baenz feiyenz, cawjranz ndaej diuzleix di gijgwn ndeu hawj lwgnyez, bangbouj ceihyw binghdwgliengz lwgnyez.

1、Aeu 5 dip noh makmug, 60 gwz byaekhau sauj, 15 gwz bwzgiz, 250 gwz nohmou cing, caez baek dang gwn, ngoenz fuk, baen 2 baez gwn. Ndaej ik heiq ciengx yaem, nyinh bwt vaq myaiz.

2、Aeu 50 gwz beghab, 200 gwz haeuxlidlu, gya 5 vanj raemx baek baenz lw 3 vanj, baen 3 baez gwn, ngoenz fuk.

3、Ngveih makhwzdauz、dangz- nae gak 30 gwz, makleiz 150 gwz, caez ngenz mienz baek raemx gwn, moix baez gwn geng ndeu, ngoenz gwn 3 baez.

4、Ngveih makgingq 10 gwz, mbek naeng soem bae le dub mienz, makleizbit aen daengz song aen, di dangznae ndeu. Sien cab makleizbit baenz gaiq, caeuq ngveih makgingq caez baek raemx, makleizbit cug seiz dwk dangznae roengz, dang caz gwn.

5、Aeu 10 gwz dangjsinh, 15 gwz makcauj cawz ngveih, 150 gwz haeuxcid, dwk habliengh raemx caez cawj cuk, gya begdangz heuz gwn.

6、Aeu 10 gwz ngveih mak- gingq, mbek naeng soem bae, dwk raemx ngenz mienz daihlawh aeu raemx, 30 gwz haeuxsan, gya raemx cawj cuk gwn.

Ciengeiz aeu geiq ndaej, fatndat geizgan gwnndoet aeu cit、yungzheih siuvaq, gwn saw roxnaeuz buenq gwd ceiq ndei, lumj haeuxcuk、faenj- haeux、faenjngaeux、raemxmak、dangduhheu daengj, caemhcaiq aeu lai gwn raemx, baujciz haexnyouh doengswnh.