Seizcin dwg aen geiqciet heiq- yiengz swng hwnj ndeu, hix dwg aen geiqciet yungzheih fatbingh he. Ndigah, seizcin ciengx ndang aeu daj gwnndoet guh hwnj. Seizcin gwnndoet wng sawcit, siuj gwn gijgwn manhget caeuq gijgwn hawqsauj.

1、Lai gwn lwgmak. Lwgmak mboujdanh yingzyangj gyaciz lai, lij ndaej hawj aenndang vunzraeuz lai dingj ndaej bingh. Seizcin dwg aen geiqciet yungzheih baenz dwgliengz ndeu, wng lai gwn di lwgmak ndeu, de ndaej bang vunzraeuz ndang cangq, daezsang rengz dingj bingh. Gij lwgmak hab seizcin gwn haenx miz: Gyoijhom、makdumh、mak- bingzgoj、makyinghdauz daengj.

Lai gwn cuk. Lai gwn di cukbaujgen ik heiq bouj lwed、cangq dungx youh yungzheih siuvaq supsou ndeu. Gwn de mboujdanh ndaej baujgen, caemhcaiq ndaej hawj vunz sim sangj baenzmaz. Cukbaujgen miz cuk byaekgep haeuxsuen、cuk haeuxsuen bwtdaep doihduz daengj.

Lai gwn byaekheu. Seizcin yungzheih baenz conghbak nengz、naeng haenz daengj bingh, wng lai gwn di byaekheu singjsien youh mbouj miz uqlah ndeu, gij byaek fanjgeiqciet wngdang noix gwn di. Gwn byaekheu seiz, ceiq ndei cingh cauj roxnaeuz guh byaekliengzban gwn.