Ndwencieng dwg aen ciet bouxboux cungj muengh ndeu, ndwencieng hix dwg saedceij vunzranz doxcomz. Gou ngoenzngoenz cungj muengh ndwencieng daeujdaengz, muengh bae muengh dauq, ngoenzneix, dauqdaej daengz cieng lo.

Ngoenzndaep banhaet, daxmeh youq ndaw ranz suek faengx, gou caeuq daxboh angqvauvau dwk bae gai cawx doxgaiq. Raeuz youq ndaw haw nauhyied haenx youz le song aen lai cungdaeuz, cawx ndaej haujlai doxgaiq. Ma daengz ranz, raeuz youh nem cih “fuk” dauqdingq、venj daengloengz, doeklaeng, gaj gaeq gaj bit. Nyaengq baenz buenq ngoenz, dauqdaej cawj byaekcaeuz ndei lo.

Mbwn laep lo, daengx ranz vunz humx aen daiz hung yaek gwn caeuzndaep. Sawqmwh daxboh ndwn hwnjdaeuj naeuz:“Gou cadi lumz lo.”Doq gangj doq byaij okbae. Caezgya cungj geizheih dwk yawj de. Gvaq yaephe, cij raen daxboh rag fwngz Goenggienz byaij haeujma, de riu dwk naeuz:“Daeuj, gya gouh dawh ndeu, haemh neix Goenggienz caeuq raeuz itheij gwn caeuz.”Gou dingq le sikhaek ndwn hwnjdaeuj bae aeu vanj dawh, seizneix daxboh gaenq cingj Goenggienz naengh haeuj daiz lo, Goenggienz mbouj ndei eiqseiq dwk naeuz:“Yienghneix mazfanz sou lai lo.” Gou daek vanj haeux ndeu song fwngz ndenq hawj Goenggienz, riunyumj dwk naeuz:“Daxgoeng, mwngz gaej guhhek, ansim caeuq raeuz gvaq haemhndaep ba!”Daxboh ciepdwk naeuz:“Dwg ha, dwg ha, Daeggienz bineix ndwencieng cizbanh, mbouj ndaej ma caeuq mwngz gvaq cieng, raeuz couhdwg lwglan mwngz, mwngz couh caeuq raeuz itheij angqhoh ndwencieng, gaej guhhek, mwngz daeuj dou mboujgvaq dwg gya gouh dawh ndeu ne.”Goenggienz gamjdoengh dwk gangj mbouj ok vah daeuj.

Raeuz caez dawz dawh hwnjdaeuj, gwn byaek gwn haeux, daihgya angqcomz giz ndeu, doengzcaez yiengjsouh gij angq ndwencieng.（指导老师：潘芳兰）