Moix baez gou bae naengh banci, cungj yawjraen gij saeh ceiq bingzfanz、caensaed, hix ceiq hawj vunz gamjdoengh haenx……

“Ci daeuj lo!” Mbouj rox boux- lawz hemq sing hung ndeu, gyoengqvunz caj ci cungj cingsaenz hwnjdaeuj, comz daengz gizdieg baeznaengz daengx ci haenx ndwn,siengj boux daih’it hwnj ci ra diegnaengh ndei. Ci ciemhciemh menh roengzdaeuj, dingz lo, daihgya lumj duzrwi ityiengh caenx hwnj gwnz ci bae. Gwnz ci vunz gig lai, aeng ndaej cungj yaek mbaetheiq lo. Miz goeng laux daih’iek 70 bi ndeu, saenzdwddwd dwk byaij hwnj ci daeuj, baegfofo, lij ae’gyo’gyo mbouj dingz. De baez hwnj ci, couh miz vunz nyiengh diegnaengh hawj de, dah lwgsau ndeu ndwn hwnjdaeuj, dawz goenglaux fuz daengz diegnaengh de bae, goenglaux gig gamjdoengh, lienzlienz gangj naeuz：“Docih, docih!” Dahsau riunyumj naeuz:“Mbouj suenq gijmaz law, mwngz gaej guhhek lai, mwngz naengh ndei!” Gangj sat couh byaij daengz bakdou ci bae lo.

Goenglaux naengh youq henz ndang gou, gou deng dahcej neix gamjdoengh lo, roxnyinh swhgeij hix wnggai lumj de ityiengh, dawz diegnaengh nyiengh hawj boux engq aeu bangcoh haenx, seizneix, youh hwnjdaeuj yah buzlaux ndeu, byoemgyaeuj de haunyo’nyo, yienznaeuz yawj hwnjbae de ndang gig cangq, hoeng nienzgeij laux lo, aeu miz diegnaengh cij ndaej. Gou cingq siengj naeuz: Daxbuz, mwngz daeuj neix naengh ba! Hoeng, vah daeuj daengz henz bak, cix baenzlawz hix gangj mbouj okdaeuj. Couh yiengh- neix, begbeg yawj de daj henz ndang gou byaij gvaqbae lo. Youq seizneix, byaij daengz baihndaw, daeg go ndeu nyiengh diegnaengh hawj daxbuz. Gou ienqhoij raixcaix. Roxnyinh swhgeij gig mbouj miz yungh, lienz dieg- naengh cungj mbouj gamj nyiengh.

Ci youh hai bae geij aen camh, miz boux daxheiz ndeu hwnjdaeuj, de dingj aen dungx hung, ngauz bae ngauz dauq. Gou lienzmuengz ndwn hwnjdaeuj, doq fuz daxheiz daengz diegnaengh gou, doq naeuz:“Daxheiz, mwngz naengh youq gizneix ba!” Daxheiz lumh aen dungx hung swhgeij, riunyumj naeuz:“Docih mwngz, baengzyoux iq, caen maq- muengh ngoenzlaeng lwg gou hix lumj mwngz yienghneix roxsoq!” Gou roxnyinh naj ndatfwdfwd, ndawsim cix diemzsisi.

Yaep ndeu, gou roengz ci lo, muengh aen ci bae giz gyae, gou lumj youh yawjraen gij cingzgingj gyoengqvunz dox nyiengh diegnaengh, dox gvensim……

（指导老师：陈彩仙）