Daxmeh gou bi neix 32 bi, ndang mbouj sang hix mbouj daemq, mbouj byom hix mbouj biz, byoemgyaeuj raezrangrang, hoeng miz haujlai byom hau lo. Gou cam daxmeh vih gijmaz miz haujlai byoem hau, daxmeh gangj dwg nienzgeij laux lo. Gou rox, daxmeh dwg vih gou causim, guhhong daiq sinhoj cix miz byoemhau.

Daxmeh gig gvensim gou, gig gyaez gou. Geiq ndaej bi’gvaq ngoenz ndeu, yaek cuengqhag seiz, mbwn laep- ngaungau, yaek fwn doek lo! Lauxsae gangj：“Gyoengq doengzhag mbouj ndaej gag baema, itdingh aeu youq ndaw gyausiz caj bouxlaux daeuj ciep cij ndaej baema！” Mbouj geij nanz, couh fwn doek caca lo. Gyoengq doengzhag boux daengz boux laebdaeb miz bohmeh ciep baema lo. Doeklaeng, ndaw gyausiz cij lw gou boux ndeu lo. Gou gig hozndat, gag gangj gag naeuz：“Daxmeh ngoenzneix mingzmingz youq ranz, mbouj bae bang vunz daetoij, hix mbouj miz gijmaz hong guh, vih gijmaz lij caengz daeuj ciep gou ne?”

Caj haujlai nanz, gou miz di simfanz lo, couh byaij okbae yawj：“Yi，haenx mbouj dwg daxmeh gou ma?” Daxmeh byaij daengz henz gou, gou miz di hozgaek dwk naeuz:“Daxmeh, mwngz caen mbouj aeu gou ha, vihmaz daengz banneix cij daeuj ciep gou?” Daxmeh lienzmuengz naeuz：“Dungzdungz, doiq mbouj hwnj, daxmeh daeuj gvaiz lo, mwngz ngaiz caj nanz lo.” Sawqmwh, gou yawjraen gwnz fwngz daxmeh nem gij gyauhbu dwkcim, laxlawz daxmeh ngamq bae dwkcim ma. Gou gig ienqhoij, gou mbouj wnggai yienghneix mbouj cam yenzyinh couh gvaiq daxmeh. Yawjraen daxmeh ndangdaej gig nyieg, lij soemh fwn daeuj ciep gou, raemxda gou doek roengzdaeuj lo. Daxmeh uet raemxda gou, riu naeuz：“Ndang gou gaenq ndei lo, lwg ha, vaiq di baema ba! ”

Ma daengz ranz, daxmeh daek raemxndat hawj gou dajcaemx, youh gvensim dwk cam:“Dahlwg, haemh neix mwngz siengj gwn gijmaz byaek ne?” Neix engq hawj gou gamjdoengh lo.

Neix couhdwg daxmeh gou. Daxmeh gyaez gou, gou hix gyaez daxmeh！（指导老师：覃珍团）