Makit yingzyangj gyaciz gig sang, ndawde hamz dangz 30% hwnjroengz. Makit mboujdanh yingzyangj gyaciz sang, caemhcaiq habbak vunzraeuz gwn. Makit cug hamz miz 15% daengz 25% dangzmakit caeuq lai cungj gvangvuzciz nem veizswnghsu doiq ndang vunz miz ik haenx, hab boux ndang nyieg siuvaq mbouj ndei haenx gwn.

Ndaw makit hamz ciujsizsonh haemq lai, ndaej bangcoh siuvaq, habdangq lai gwn di makit he ndaej cangq dungx huz dungx, doiq ndangdaej daih miz ndeicawq.

Raemx makit doiq bouxbingh ndang nyieg、boux baenz sailwed giet ndongj、boux baenz mak in miz bangbouj ceihyw cozyung, boux lwedhaw hix gwn ndaej. Boux baenz sinzgingh hawnyieg caeuq boux guhhong naetnaiq gvaqbouh haenx gwn le ndangrengz hoizfuk vaiq. Makit dak sauj le gwn, dwg gij huq nyinhbouj ndei lwgnyez、mehmbwk caeuq boux ndang nyieg lwedhaw haenx.

Makit dwg cungj yw nyinhbouj he, ndaej bouj haw cangq dungx. Boux ndangdaej hawnyieg、boux yingzyangj mbouj ndei wng lai gwn di. Aenvih ndaw makit hamz miz danbwzciz、anhgihsonh、lonjlinzcij、cenhveizsu、gvangvuzciz daengj lai cungj yingzyangj cwngzfwn, hamz dangz lai, yungzheih deng ndang vunz cigciep supsou leihyungh.

Ceh makit 95% cwngzfwn dwg yenzcinghvasu, dingj yangjva goengyauq beij veizswnghsu C sang gvaq 18 boix, beij veizswnghsu E sang gvaq 50 boix. Ndigah, ceh makit ndaej dingj bouxvunz lauxvaq, hawj vunz lai coz nanz geq.