Gwn saejdaeuz gaenq baenz aen bouhfaenh ndaw swnghhoz vunzraeuz he, haujlai vunz ngoenznaengz cungj noix mbouj ndaej gwn saejdaeuz.

Makcauj daj ciuhgeq roengzdaeuj couh deng lied guh 5 mak(makdauz、makmaenj、makseq、makhingq、makcauj) ndawde cungj ndeu, guek raeuz gwn makcauj lizsij gyaenanz, ndawbiengz itcig riuzcienz miz aen gangjfap he heuhguh “ngoenz gwn sam aen makcauj, gyaeu ndaej bak bi mbouj raen geq”、“siengj aeu naengnoh ndei, ndaw souh dwk makcauj” neix. Cunghyih nyinhnaeuz, makcauj nding ndaej nyinh ciengx sailwed, ndaej yw fajnaj hawqsauj、naengnoh mbouj wenj、heiqlwed mbouj cingq daengj bingh.

Geij bi daeuj yenzgiu caenh’itbouh cingqsaed, makcauj hamz dangz lai, miz daezsang menjyiz、dingj ndaej aiz、dingj ndaej aiswzbing daengj sengleix goengnaengz.

Ndaw makcauj hamz miz cenhveiz gijgwn lai, moix 100 gwz makcauj ndawde hamz miz 6.2 daengz 9.5 gwz nyinzsei gijgwn, gij nyinzsei gijgwn neix ndaej bang raeuz hanhhaed gij ndat、yawhfuengz fat biz、coicaenh conghsaej noddoengh、fuengz ndang vunz sup haeuj danjgucunz daiq lai.

Makcauj cawz ndaej cawj souh gwn le, caemh ndaej dawz daeuj dang guh saejdaeuz gwn. Couhcinj de hamz miz daihliengh dansuij vahozvuz, hoeng, de ca mbouj lai mboujmiz saek di youzlauz, nyinzsei gijgwn lai, gwn de mizleih ndangdaej gengangh.