Bingzciengz, gou gig gyaez lienh ndangdaej, lumjbaenz youq gwnzgiuz diuqcag, youq ranz dik yienq, youq caujbingz dwk yijmauzgiuz……Gou moix ngoenz cungj lumj duz mbungqmbaj ityiengh, vaiqlag mbin bae mbin dauq.

Miz ngoenz ndeu, daxboh daiq gou bae gvangjcangz guhcaemz. Gwnz gvangjcangz vunz caen lai ha！

Gou daeujdaengz gizdieg lienh ndangdaej, couh sikhaek bae benz suenggangq, gou youq gwnz sueng- gangq bi bae bi dauq, baeg le naengh youq gwnz suenggangq yawj funggingj. Yaep ndeu, gou yawjraen bangxhenz miz dangangq, couh siengj daj suenggangq diuq hwnj gwnz dangangq bae. Hoeng, baez mbouj siujsim, gou couh daj gwnz dangangq doek roengzdaeuj lo. Gou gamjdaengz da va, yaek ngunh gvaq bae lo. Daxboh fuz gou hwnjdaeuj cam：“Baenzlawz yienghneix mbouj siujsim? Laemx in lwi?” Gou gaenq singj lo, dap naeuz：“Mbouj in.” Gizsaed gou gig in, Hoeng, gou mbouj gamj gangj, byawz heuh gou lienh ak ha?

Gou naengh yaep he, youh cang guh mbouj miz saeh ityiengh dauqcawq langqlangh haujlai nanz, cij haengj caeuq daxboh baema.

Ma daengz ranz, din gou gig in, gou haeuj rug bae gven dou, duet vaq baez yawj, fatyienh gwnz bangxga baihswix miz gaiq fod hung ndeu. Danghnaeuz deng daxmeh raen le itdingh sim’in, baezlaeng couh mbouj hawj gou gag bae rog guhcaemz lo. Baenzlawz guh ne? Gou caegcaeg dawz gij sieng lwnh hawj daxbuz nyi, daxbuz sim’in dwk raemxda yaek doek roengzdaeuj, de naeuz：“Yungh laeujcing swiq ndaej gemj in, lij ndaej siu foeg.” Daxbuz cat laeujcing hawj gou, gou gamjdaengz liengzsisi, ndei haujlai lo. Mbouj geij ngoenz, gij sieng couh ndei lo.

Vah bouxlaux gangj：Deng hit baez ndeu, couh rox lai di saeh ndeu. Daj baezhaenx hwnj, gou couh rox laeujcing baenzlawz yungh lo, hix mbouj gamj caiq luenh bae saj dangangq lo. Gou hag rox le ancienz bae guhcaemz.（指导老师：覃珍团）