Bouxboux cungj miz haujlai baez daih’it, lumjbaenz baez daih’it cawjngaiz, baez daih’it byaij loh- laep, baez daih’it hwnjdaiz byauj- yenj……Hoeng seizseiz heux youq ndaw sim gou dwg baez daih’it gag youq ranz gvaq haemh.

Seiziq, gou ninz seiz cungj miz bohmeh buenx, hoeng baez- haenx……

Haenx dwg haemh rumz haenq fwn raq ndeu, daxmeh bae ranz daxdaiq lij caengz dauqma, daxboh youh deng baengzyoux heuh bae gangjgoj. Daxboh byaij seiz daengq gou:“Dahlwg, yaephe mwngz aeu gvai ha, ninz caeux di, daxboh mbouj geijlai nanz couh dauqma lo.” Mbouj caj gou han, daxboh couh gven dou hung okbae lo. Gou gag naengh youq gwnz eij yawj densi, sim diuqbubbub. Bingzseiz, ciengzciengz dingq lwgsai gangj gojgaeq duzfangz, seizneix gij dwglau haenx mbouj dingz dwk nyoengx haeuj ndaw uk gou, gou sim diuq gig youqgaenj, yied daeuj yied lau, “banglang” yiengj sing hung ndeu, gou deng hwk dwk ngwngh bae baenz buenqngoenz, yenzlaiz dwg byajraez ha, gou ganjgip dawz sing densi diuh daengz “40”，yienzhaeuh daemh gwnz dieg daemh ndaej gig yiengj bae, gou laihnaeuz yienghneix goemq ndaej gvaq gij dwglau ndaw sim gou, hoeng, neix cungj mbouj miz yungh, ndaw sim gou caen lumj cib haj aen doengj diuq raemx——Caet hwnj bet roengz ha！Baihrog conghcueng rumz gwj ci gwj rengz, fwn gwj doek gwj haenq. Gou ndaw sim siengj: Dwg mbouj dwg caen miz duzfangz dahraix ne？Gou wnggai baenzlawz guh ne？Song cik ga gou youz mbouj ndaej saenzdedded hwnj- daeuj, mbouj rox daj gyawz miz geu rengz daeuj, hawj gou maenh heiq doiq swhgeij naeuz:“Gwnzbiengz gaenbonj mbouj miz duzfangz, caiq gangj gou youh mbouj guh gvaq gijmaz saeh rwix, duzfangz baenzlawz rox daeuj ra gou ne?” Gou doq gag nambedbed, doq byaij ma ndaw rug gou. Gou gven daeng yaek laeujninz, fatyienh aen seiqgyaiq yaepyet mbouj miz lo, iet fwngz mbouj raen lwgfwngz, gou fwt dwk youh hai daeng, ndaw rug yaepyet youh rongh lo, gou cij soeng gaemz heiq ndeu. Gou ninz youq gwnz congz, dawz gak denz gaem ndaetndaet bae, lij dawz gyaeuj moek haeuj ndaw fan denz. Baihrog byajraez byajmyab doxgyaux, “banglang”yiengj sing hung ndeu, saenq rwz yaek nuk, ciep dwk ndaw rug laepngaungau, dingz dienh lo. Gou ndaw sim mbouj duenh naeuz swhgeij: Mbouj lau, itdingh aeu dwk hingz haemhlaep、fwnraq、duz- fangz …… Ciemhciemh dwk, gou baeg lo, gou laep lwgda ninzndaek bae lo, hawj bouxwnq bae nauh ba! Youq ndaw fangzhwnz loq, gou raen swhgeij majhung lo ……

Baezlaeng, gou caiq hix mbouj lau gag youq ranz gvaq haemh lo. Gou lij rox gwnz seiqgyaiq yenzlaiz mbouj miz duzfangz, cij aeu mwngz mbeihung, caemdingh, cij ndaej dwk hingz laepngau, ciep daeuj nditrongh.（指导老师：陈彩仙）