Daswyenz dwg geijlai gyaeu- ndei ha, guh daswyenz ndawde boux ndeu, gou——rumz, yaek bae yawjyawj daswyenz geizheih, lij aeu daiq vaiqvued hawj daswyenz.

Seizcin daeuj lo, gou mup gij heiq cin, daeuj daengz ndaw suenva. Gou angqvauvau caeuq gyoengq baengzyoux doxdongx:“Va dahcej, mwngz ndei! Mwngz baenzneix rongh’oiq, baenzneix gyaeundei, lij fat ok heiqhom. Faex daxgoeng, mwngz ndei! Mwngz youh did ok ngaz moq lo, youh daiq swnghgih daeuj hawj daswyenz lo.”Gyoengqde hix angq dwk dap gou naeuz:“Rumz dahnuengx, mwngz guhhek lai lo, deng lo, mwngz yawj gou cungj nienzgeij hung lo, mwngz lij gangj gou baenzneix ndei.” “Gou cij dwg gangj vahcaen hane. Ndei lo, gou yaek bae gizwnq lo, menhyouq nw.”Gangj sat, gou daiq gij heiq homva daengz gak aen gungx daswyenz bae.

Seizcin gig vaiq gvaqbae lo, seizhah yaek daeuj lo, gou youh daeuj daengz gwnz diegnywj. Diegnywj youq laj nditndat hwngqfwgfwg. Hoeng lij miz vunz youq gwnz diegnywj hwngqfwgfwg neix gwih max buet. Gou daeuj daengz henz ndang duz max ndeu, “max daeggo, mwngz youq laj ndit baenz haenq lij buenx boux cawj buet, caen ak ha!” Gou boiqfug dwk gangj. Max daeggo ajngaeb dwk doiq gou naeuz:“Neix mbouj miz gijmaz, gou ciengzseiz buenx bouxcawj buet, gaenq gvenq lo.”“Hawj gou bang mwngz beiz liengz mbat he ba!”Gangj sat, gou couh baenq youq seiqhenz max daeggo, hawj de mbouj gamjdaengz hwngq lai.

Gig vaiq, seizhah hix gvaqbae lo, seizcou daeuj lo. Mbat neix gou daeuj daengz rog ndoi, baenz benq baenz benq haeuxnaz bienqbaenz le saek henjgim, gou daj gwnz gyaeuj gyoengqde byaij gvaq, gyoengqde couh angqvauvau dwk diuqfoux hwnjdaeuj, moix go haeux cungj diuq, baenz cien baenz fanh go itheij diuq, lij miz duzroeg cici caca ciengq go buenx gyoengqde. Ndaw suenmak, mak cungj baenz lo, gou daengz henz godauz, doiq gomakdauz naeuz:“Makdauz daegnuengx, mwngz ndei! Mwngz naengnoh hoengzoiq, yawj hwnjdaeuj gig ronghlwenq, lij fat ok heiqhom diemzsubsub.”“Rumz dahcej, mwngz haenh daengz gou najnyaenq lo.” Gou youh youq ndaw suenmak baenq hob ndeu, yienzhaeuh youh bae lingh dieg lo.

Mbouj geij nanz, seizcou gvaqbae lo, seizdoeng daeuj lo. Gou daeujdaengz ndaw luegbya. Gwnz faex cungj cw miz caengz nae he, najraemx raemxmboq hix giet caengz naehang lo, roeg cungj mbin daengz diegraeuj bae lo, daengx luegbya cungj caemrwgrwg, yawj gvaqbae hausaksak. Nae yied doek yied hung, gou dongx vanae dahcej:“Vanae dahcej, mwngz ndei! Mwngz ngaeuzndang hausak, yiengh ndang gyaeundei, youq gyangmbwn diuq- foux, caen lumj dahsien gyaeundei.”Vanae dahcej najnyaenq dwk gangj:“Mbouj law, gou mbouj miz mwngz gangj baenzneix ndei law.”Gyoengqraeuz youq ndaw vuenheij doxgangj dohgvaq aen seizdoeng neix lo.

A! Daswyenz, mwngz caen gyaeundei raixcaix! Gou lij aeu laeb- daeb yawj gij gyaeundei mwngz.

（指导老师：潘文清）