Nditrongh daj conghcueng ciuq haeuj congz iq gou daeuj, gou nunu song ceh da ngamq ninz singj haenx, fatyienh daxmeh caeux couh bae guhhong lo. Daxmeh bae gwnz haw bang vunz gai doxgaiq, mbouj miz ngoenz yietbaeg, cungj dwg haet bae haemh ma, hoeng de baez daengz ngoenz singhgiz roengzban dauqma, cungj aeu baet ranz seuqsatsat baez ndeu, de muengz hongranz youh muengz hongrog, gig sinhoj, gou yawjraen daxmeh hanh lae hanh roenx, gig sim’in.

Baezneix, gou aeu hawj daxmeh sim’angq baez he, gou yaek bang de guh di hong he！Gou sikhaek hwnq congz, gaem sauqbaet hag gij yiengh daxmeh sauq ranz hwnjdaeuj, gou daj baihswix sauq daengz baihgvaz, lij seiz mbouj seiz nyeux gyaeuj gvaqbae yawjyawj gizlawz sauq mbouj seuq couh donq dauqbae caiq sauq, mbouj yaep he, baihnaj couh comz miz haujlai nyapnyaj lo. Gou aeu aen canjgei daeuj cang nyapnyaj deuz, youh hag daxmeh dawz byoem gyuj youq gwnz byai sauqbaet haenx cingleix rongzdaeuj. Hoeng, gwnz dieg lij miz geij giz gig uq, mboujguenj baenzlawz haenqrengz sauq, cungj sauq mbouj seuq, gou couh gietdingh aeu dobaet daeuj do.

Gou dawz dobaet cimq ndaw raemx bae, youq ndaw dinghung do bae do dauq, gou guh ndaej hanh lae hanh roenx, hoeng, lij raen yaenqdin uq gou. Baenzlawz banh ne? Sawqmwh, gou siengj hwnj daxmeh bingzseiz do dieg seiz, sien dawz dobaet nyaenj raemx hawq bae caiq do dieg, do dieg seiz lij aeu dauqdonq byaij dwk do. Yienghneix, gou itmienh do itmienh donq dauq laeng, guh baenz haet ndeu, dauqdaej dawz dinghung uet ndaej ronghsagsag, lumj aen gingq nei lo. Yienznaeuz gou guh ndaej baegfofo, hoeng, ndaw sim diemzsisi.

Daxmeh guhhong ma lo, yawjraen daengx ranz seuqsatsat, de got gou ndaetfwdfwd dwk riu lo.

（指导老师：覃珍团）