Sahswbijyah gangj gvaq:“Saw dwg yingzyangjbinj daengx seiqgyaiq.”Hoeng gou roxyinh saw mboujdan dwg yingzyangjbinj, lij dwg boux baengzyoux ndei ndeu, hix dwg boux lauxsae ndei ndeu. Baengzyoux, ndaej hawj raeuz gadog seiz mbouj caiq fwz; lauxsae, youq mwh raeuz yozsiz bungzdaengz vwndiz seiz, ndaej bangcoh raeuz cijdauj raeuz.

Gou ceiq gyaez gij saw mizgven sij faenzcieng haenx, aenvih de ndaej daezsang gij bonjsaeh sij faenzcieng gou. Geiq ndaej lij iq seiz, gou gaenbonj mbouj rox faenzcieng dwg gijmaz, itcig daengz sam nienzgaep, gou cij rox: Faenzcieng couh dwg dawz gij ginglig bonjfaenh roxnaeuz gij saeh swhgeij naemj daengz haenx sij roengzdaeuj. Doeklaeng, daxmeh cawx haujlai saw mizgven sij faenzcieng hawj gou, gou lumj dungxiek hoz- hawq ityiengh, yawj dwk feihdauh raixcaix, lumj fiz lumj mwnh. Yawj liux baez dem baez. Doeklaeng gou youh youq ndaw hag dingh《Cozvwnz Davangz》. Moix ngoenz cuengqhag dauqma, gou sij cozyez liux le, couh dawz saw okdaeuj yawj, ndawde miz haujlai swz ndei vah ndei duenh ndei, gou youh cau roengzdaeuj, geiq youq ndaw sim. Daengz sij faenzcieng seiz, gou couh ndaej yungh daengz lo.

Saw, hawj raeuz youq ndaw haijyangz cihsiz youz. Saw, youq raeuz bungzdaengz gunnanz seiz bangcoh raeuz. Saw, gou gyaez sou. Gou itdingh daj gwnz ndang mwngz hag cihsiz engq lai, majhung le vih sevei guh ok gunghawj.（指导老师：潘文清）