Ngoenzneix, gou youq ndaw doenghnaz ginglig baez geizheih ndeu, gou gingqyienz lumz swhgeij lo.

Gou ninz youq gwnz fiengz ndaw doenghnaz, sawqmwh miz duz doenghduz iq ndeu diuq hwnj gwnz naj gou daeuj, gou bala naengh hwnjdaeuj, yawjraen duz daekgaeuj ndeu saet deuz. Gou ganjvaiq gyaep bae riengz.

Gaen le geij faen cung, raeuz daeuj daengz aen “ndoengfaex”ndeu, gizneix dwg benq ganjfiengz ndeu, duz daekgaeuj neix youq ndaw de diuq bae diuq dauq. Gou guj, mbaw nywj dwg ganj diuqgyae de, nywjrum dwg fan demh ancienz de. Aen yindungcang youh an’oij youh swhyienz yienghneix, gou guj cij miz duznon ra ndaej raen.

Gvaq yaephe, duz daekgaeuj youh saet bae naj. Gou caeuq de byaij gvaq haujlai diuz gai, dauqdaej daeuj daengz aen “ndoengfaex” engq hung lo. Va, neix itdingh dwg aen seiqgyaiq doenghduz lo. Gizneix miz haujlai non: Miz duzmoed lumj naed haeuxsan nei; miz duzmbaj lumj duj va nei; miz duzbiengzbeih lumj feihgih nei……Gou yawj ha yawj ha, sawqmwh duz coengmax ndeu byaij gvaqdaeuj, gou siengj: Duz coengmax wnggai dwg gungh- gyauhceh gyoengqde ba. Cijraen duz coengmax aj bak geij baez, lumj naeuz:“Sou ndei, sou siengj bae gizlawz, gou daiq sou bae!”

“Vwng vwng vwng, vwng vwng vwng……”Neix dwg bouxlawz? Gou baez yawj baihlaeng, o, yenzlaiz dwg bang rwi ndeu, gyoengqde bek doiq fwed mbang, lumj gingjcaz ityiengh hai cizswnghgih cunz gyangmbwn, gij singyaem“vwng vwng vwng”haenx lumj yinhyoz nei, hawj gou dingq le hix siengj diuqfoux hwnjdaeuj, gou bienqbaenz duz non ndeu.

Seizneix, gou da yawj baihgvaz“ndoengfaex”, gou yawjraen bang vunzguhhong ndeu cingq buen doxgaiq gwn, gij doxgaiq gwn haenx beij aen ndang swhgeij hung geij cib boix. Gyoengqde baengh coengmingz cihgeij buen ndaek doxgaiq neix, caen hungmbwk lo! Gou mbouj ndaej youq henz yawj ndwi, aeu bang gyoengqde mbat ndeu. Yienghneix, gou iet fwngz okbae. Siengj mbouj daengz, fwngz ngamq iet, gou sikhaek singj lo, yenzlaiz gou mbouj dwg doenghduz.

Ma daengz ranz, gou lij ngeixdauq gij saeh mizyinx neix, ndaw sim cungmuenx geizheih. Gou itdingh roengzrengz doeg saw, damqcaz aumiz doenghduz.

（指导老师：潘文清）