Gvaq cieng dwg seiz ceiq angqyangz gyoengq lwgnyez. Aenvih ndaej daenj buhmoq﹑vaqmoq caeuq mauhmoq, lij ndaej suek faengx, nem doiq, dox hohheij. Gvaq cieng caen sim’angq ha!

Ndwenlab ngeih cib geij, daxbuz caeuq daxmeh couh nda daiz suek faengx rangfwdfwd lo. Daxbuz sien ra rongfaengx ma, cuengq ndaw gu bae log unq bae, log hwnjdaeuj aeu raemx swiq seuq bae, langh hawq bae. Yienzhaeuh, dawz haeuxcid swiq ndei, aeu nohmou、 duhhoengz、 lwgraz、faenjhajrang doxgyaux guh hamh, couh ndaej suek faengx lo. Daxbuz suek aen faengx youh vaiq youh gvai, daxmeh hix mbouj fug saw, hag daxbuz suek faengx, hix suek ndaej aenfaengx aen beij aen ndeiyawj. Daxbuz lwnh gou faengx aeu cawj 10 aen cungdaeuz doxhwnj, gwn hwnjdaeuj cij rangfwdfwd, ndigah daxbuz dumq faengx seiz cungj mbouj ninz. Faengx dumq cug le, gou biengj fagu hwnj, feih rangfwdfwd couh bongh haeuj ndaeng daeuj, gou log aen ndeu hwnjdaeuj, sawq gaemz ndeu, “va, rang lai lo, caen dwg doxgaiq ndeigwn lajmbiengz ha!” Gou nyaenx mbouj ndaej danqhaenh naeuz.

Nem doiq dwg gienh saeh gvaqnienz aeu guh ndeu, bouxlaux dawz fouqdoiq nem youq bakdou ranz, lij dawz cih “fuk” daeuj dauqdingq nem youq najham roxnaeuz fadou hung, eiqsei dwg fuk daeujdaengz lo.

Nienz co’it, haetcaeux, gou daenj buhmoq ndei le, simgaenj dwk bae baiq bouxlaux lo. Gou naeuz daxgoeng:“Goengheij daxgoeng, miz fuk miz souh.” Daxgoeng riuhoho dwk hawj gou aen bauhoengz hung ndeu, gou caen sim’angq ha. Gou youh bae goengheij daxbuz﹑ daxboh﹑ daxmeh﹑goeng’au﹑ mehsimj caeuq daxgux, yaep he, aen daeh buh gou couh bongzbwdbwd lo. Daengz gyanghaemh, dou daengx ranz vunz humx dong feiz gyoqfeiz yawj densi, daengz 0 diemj cung, dou youh angqvauvau dwk bae yawj cuengq bauqva, nyingz lwgbauq. Byonghhwnz laeg lo, daxmeh gwj coi gou, gou cij sij mbouj ndaej con haeuj ndaw denz bae ninz.

……

Ai! Ndwencieng ngoenz- ciet youh gvaqbae lo. Gou caen maqmuengh cieng bimoq vaiq di daeujdaengz ha!

（指导老师：韦彩芳）