Danghnaeuz gou dwg diuz rij ndeu, gou yaek caenh bonjsaeh ceiq hung gou bae bangcoh doenghgij vunz sihyau gou. Ngoenzneix yaek lae bae daswyenz, bae ra doenghgij vunz sihyau gou bangcoh haenx.

Gou lae roengz doenghnaz bae, yawjraen doenghnaz youq laj nditndat dak dwk mizdi reuq lo, gyoengqvunz gaenx hong haenx cingq youq ndaw naz guhhong, najbyak iemq baenz naed baenz naed hanh. Gou sikhaek lae daengz laj gohaeux, lae daengz laj din gyoengqvunz, hawj gyoengqde gamjsouh gij liengz daswyenz. Seizneix, gohaeux gwn gij raemx gou, itdingh maj ndaej engq vaiq. Gyoengqvunz gamjsouh daengz gij liengz gou, hix itdingh daj ndaw sim docih gou. Gou raen najriu gyoengqde ronghsagsag, couh habhoz lo.

Danghnaeuz gou dwg diuz rij ndeu, gou yaek lae daengz diegsa bae. Gwnz diegsa gofaex daeggo itdingh hozhawq yaek dai lo, mboujnex gyoengqde baenzlawz yienghneix byombyangbyang? Dujva dahnuengx hix itdingh hozhawq yaek dai lo, mboujnex gyoengqde baenzlawz yienghneix reuq ne? Gou yawj le ndaw sim gig hojsouh, sikhaek lae gvaqbae, itcig lae roengz goek rag gyoengqde bae. Yaepyet, gofaex daeggo bienq ndaej sangnengneng, dujva dahnuengx naj bienq hoengz lo. Gyoengqde angq dwk ngauzgyaeuj hwnjdaeuj, lumj doiq gou naeuz:“Rij dahnuengx, docih mwngz gouq raeuz, dwg mwngz gouq dauq sengmingh raeuz. Raeuz caencingz docih mwngz!” Dingqnyi gij vah neix, ndaw sim gou vaiqvued fouzbeij.

Danghnaeuz gou dwg diuz rij ndeu, gou yaek lae daengz gij dieg mbwnrengx bae, hawj gyoengqvunz gaij hozhawq, dwk gij naz reih gaenq dek haenx, rwed gij va nywj faex yaek daireuq haenx. Gou yaek dawz gyoengqvunz daj ndaw haemzhoj rag okdaeuj.

Danghnaeuz gou dwg diuz rij ndeu, gou yaek lae ha lae, lae daengz……

Gou caen maqmuengh gou dwg diuz rij ndeu, lae haeuj gizdieg sihyau gou, bae bangcoh doenghgij vunz、doenghyiengh sihyau gou.

（指导老师：潘文清）