3 nyied 3 hauh daengz 12 hauh, aen hoih Daengx Guek Cwnghez Cibngeih Gaiq Ngeih Baez Veiyi youq Baekging hai. Youq haihoih 10 ngoenz ndawde, 2000 lai boux cwnghez veijyenz haenqrengz roengzsim daez genyi. Ndawde, Daengx guek cwnghez veijyenz、Cunghgoz Vaivwnzgiz gizcangj Couh Mingzveij youq cwnghez siujcuj veiyi ndawde daezok aen genyi ndeu, couhdwg yaek guh ndei hong minzcuz, couh deng yawjnaek hagsib vahgangj、vwnzva saujsu minzcuz, aen genyi neix yinx le daengx guek gak cuz ganbu ginzcung yawjriengz nem haenhndei.

3 nyied 4 hauh, youq siujcuj gangjvah ndawde, Couh Mingzveij gangj daengz gij saujsu minzcuz vwndiz dangqnaj vunzlai gvensim de, couh naeuz vihliux caeuq vunz Ouhcouh、Meijgoz nem Yizbwnj doxgyau, raeuz aeu haujlai seizgan bae hag gij vah de. Danhseih dauq yawj raeuz ne, doenghboux guh hong saujsu minzcuz de miz geijlai boux hag vah saujsu minzcuz guek raeuz ne? Ciuq neix daeuj gangj, yaek caencingq rox doenghboux saujsu minzcuz, caeuq gyoengqde doxgyau ndaej ndei, sien aeu rox gangj gij vah de gonq.

Couh Mingzveij nyinhnaeuz, guek raeuz yaek guh ndei hong saujsu minzcuz, sien heuh doenghboux guh hong saujsu minzcuz de hag vahgangj nem vwnzva saujsu minzcuz.“Neix caeuq hungzyangz vwnzva Bouxgun、vwnzva cujyau guek raeuz mbouj doxdingj, dauqfanj hawj raeuz gij vwnzva lai cungj lai yiengh de ndaej riuzcienz bae nanz、ndaej bauj miz lai yiengh.”

(ciuq Cunghgoz Vangj)