3 nyied 5 hauh, aen hoih Cibngeih Gaiq Daengx Guek Yinzda Ngeih Baez Veiyi youq Baekging hai. Miz gyawj 3000 boux daengx guek yinzda daibyauj daiq gij naemjngeix vunzlai daengq hawj de bae haihoih, rapdawz ndei gij cwzyin hungnaek youz yenfaz nem faplwd gvidingh de.

Baez hoih neix, daengx guek yinzda daibyauj、Gvangjsih Boux- cuengh Swcigih Minzveij、Minzyijveij cujyin Luz Yenbenj hopheux gij cingzgvang gih raeuz, daegbied dwg gij naemjngeix saujsu minzcuz de, daezok 6 aen genyi: Cingj guekgya bangcoengh gih raeuz gyarengz guh hong gvangjbo yingjsi vah minzcuz、sien bangcoengh vehdat Byaraiz sinhbau sigai yizcanj、coengh moix aen saujsu minzcuz laeb aen guekgya gaep saujsu minzcuz bozvuzgvanj ndeu（lumj Cungguek Bouxcuengh bozvuzgvanj）、 coengh gih raeuz daezsang suijbingz bang gyoengq- vunz senj ok gugih de、lai bangbouj vunz henzguek gih raeuz、coengh Gvangjsih Veisi Binzdau ndaej youq daengx guek mienxfeiq ciepsou. Daez gij genyi neix, de naemj dawz gij naemjsiengj nem maqmuengh vunz gih raeuz daegbied dwg saujsu minzcuz ganbu ginzcung de gangj okdaeuj, hawj guekgya mizgven bumwnz nem sevei gak gyaiq yawjnaek, doidoengh gij hong mizgven ndaej guh baenaj.

Youq ndaw geiyi de, cingj guekgya bangcoengh gih raeuz gyarengz guh hong gvangjbo yingjsi vah minzcuz、sien bangcoengh vehdat Byaraiz sinhbau sigai yizcanj、coengh moix aen saujsu minzcuz laeb aen guekgya gaep saujsu minzcuz bozvuzgvanj daengj, ndaej gih raeuz gak cuz ganbu ginzcung caeuq sevei gak gyaiq haenhndei raixcaix, ndawbiengz vunzlai lwnhgangj haemq lai. Yaek rox neiyungz sijsaeq gij genyi neix, cingj hwnj Gvangjsih Minzcuz Bau Vangj (http://www.gxmzb.net) roxnaeuz Gvangjsih Minzveij Vangj (http://www.gxmw.gov.cn) bae yawj.

(Ciuq Swcigih Minzveij Vangj)