1、Hawj vunz lai gwn ndaej doxgaiq. Ndaw byaekgep hamz miz veihfazyouz doenghgo rangfwd, hawj vunz lai gwn ndaej doxgaiq, bouxlaux、lwgnyez、mehdaiqndang habdangq gwn di byaekgep ndeu, ndaej hawj vunz lai ndang cangq.

2、Cangq dungx siu cwk. Byaekgep ndaej bauj raeuj、cangq dungx, gij nyinzsei co ndaw byaekgep ndaej coi dungxsaej noddoengh, bang siuvaq. Mboujdanh ndaej yawhfuengz haexgaz caeuq diuzsaej baenz aiz, lij ndaej dawz mbangj huqcab ndaw saej suek ndei riengz haex baiz ok rog ndang daeuj, ndigah ndawbiengz haenh de guh“byaek swiq saej”.

3、Sanq cwk vued lwed. Byaekgep ndaej sanq cwk vued lwed、gej doeg, gyangqdaemq hezcij ndang vunz, ndaej fuengzceih gvanhsinhbing、lwedhaw、doenghmeg giet ndongj.

4、Gaj nengz siu humz. Liuzvahozvuz ndaw byaekgep miz gaj nengz siu humz cozyung, ndaej hanhhaed luznungzganjgin、siqdungx、sienghanz、dacangzganjgin caeuq buzdauzgin.

5、Hoh naeng raeh da. Ndaw byaekgep hamz veizswnghsu A lai, lai gwn de mboujdanh ndaej meijyungz hoh naeng、raeh da nyinh bwt, lij ndaej hawj vunz noix baenz siengfung dwgliengz、 ae’ngab dem.

6、Bouj heiq cangq yiengz. Vunz ciuhgeq heuh byaekgep guh “byaek cangq yiengz”, ndaej fuengzceih yangzveij、nyouh lai、hwet in、ga unq daengj bingh heiq mak haw.