Aenvih makdumh yingzyangj gyaciz sang, daegbied hab seizcin gwn guh ciengx ndang, ndigah deng yingzyangjyozgyah haenh guh “seizcin daih’it mak”.

Youq ndaw bonj 《Bwnjcauj Ganghmuz》geiq naeuz, makdumh ndaej nyinh bwt、cangq beizheiq、bouj lwed、ik heiq, doiq bouxlaux、lwgnyez caeuq boux ndang haw daeuj gangj, dwg gij huqbouj ndei.

Makdumh yingzyangj boiqbeij gig hableix, ndawde veizswnghsu C hamzliengh daih’iek dwg daengjliengh sae’gva、 makit roxnaeuz makbingzgoj 10 boix, linghvaih, ndaw makdumh hamz diet、dangzmak、dangzmakit、ningzmungzsonh、bingzgojsonh daengj, doiq boux seizcin yungzheih baenz bwt ndat baenzae、conghhoz in daengj cungj ndaej hwnj daengz bangbouj ceihyw cozyung. Doengzseiz de aenvih hamz diet, boux baenz lwedhaw ndaej ciengzseiz gwn. Boux beizheiq dungx haw、 bwt haw baenzae mbouj hab gwn lai, yaek gwn gaxgonq sien dwk roengz raemxgyu cit bae cimq 10 faen cung, doeklaeng yungh raemxsaw cungswiq caiq gwn.