Seizcin lienhndang aeu haeujsim bauj raeuj aenndang, gamjdaengz aenndang loq fatndat seiz caiq duet buh. Linghvaih, seizcin lienhndang mbouj ndaej gvaqbouh, gaej lienh dwk hanh lae hanh roenx.

Vunzraeuz cungj nyinhnaeuz lienhndang ok hanh yied lai, yindung yaugoj couh yied ndei, gizsaed mbouj dwg yienghneix. Mwh vwnhdu habngamj seiz, lienhndang ok hanh haengjdingh yaugoj gig ndei. Danhseih seizcin beij seizhah mbwn liengz ndaej lai, ok hanh daiq lai rox hawj conghbwn mbe gvangq, heiqliengz heiqcaep ciemq haeuj ndang vunz bae le vunz yungzheih baenz dwgliengz, daj neix yaeuhfat huhgizdau ndaej bingh.

Cunghyih nyinhnaeuz, hanh caeuq sim、lwed miz gvanhaeh maedsaed, ok di hanh ndeu miz itdingh baiz doeg cozyung, danghnaeuz ok hanh daiq lai, veizlieng yenzsu dijbauj ndaw ndang couh rox riengz hanh baiz okdaeuj, sim lwed、heiqyiengz couh sied bae lai. Ndigah, seizcin lienhndang gaej hawj ok hanh daiq lai, ngamq ok hanh couh ngamj, lienhndang sat doq sikhaek mad hanh hawq vuenh buhvaq, fuengz baenz dwgliengz. Danghnaeuz gaenq baenz dwgliengz, wng lailai yietnaiq, caj dwgliengz ndei le caiq bae lienhndang.