Seizcin dingzlai vunz cungj gamjdaengz bak hawq linx sauj, cix gag ra ywnyinhhoz daeuj gwn, danhseih canghyw daezsingj naeuz: Gaej luenhlanh gag gwn ywnyinhhoz!

Huhgizgoh conhgyah gaisau naeuz, ywnyinhhoz youq gwnz linzcangz ciengzseiz yungh daengz, mbangj ywnyinhhoz hamz miz denj fwnhswj, vuedsingq daih, gaj nengz ak, ndaej hanhhaed nengzbingh sanjmaj, danhseih gig nemmuek conghbak hix ak. Linghvaih, boux miz denj gominj gvaq roxnaeuz mehdaiqndang、mehcijlwg cungj mbouj hab hamz gwn. Boux miz denj gominj danghnaeuz hamz gwn, couh rox fatseng gominjsing fanjying, okyienh diemheiq gaenj、saeknaj haumiek、naengbak heuaeuj、naengnoh hwnj baenz diemj baenz diemj nding daengj binghyiengh, mbangj boux lij okyienh daengx ndang gyoetgyat dem. Mehcijlwg danghnaeuz hamz gwn ywnyinhhoz, gij denj ndaw yw rox doenggvaq raemxcij yingjyangj nyeznomj sengmaj fazyuz.

Neimungzguj Yihyozyen Fusuz Yihyen Cangh Sezfungh gyausou gienq daihgya naeuz, ywdingzae conhbei ndaej siu ndat nyinh bwt、vaq myaiz dingz ae, danhseih cijdan yungh daeuj yw ndat ae, bingq mbouj dwg naeuz baenz cungj ae lawz cungj gwn ndaej, itdingh aeu ginggvaq canghyw duenq le cij ndaej gwn.