Youq ndaw sing angq sing riu, dou soengq aen seizdoeng hausausau byaij lo,youh coux ma aen seizcin lai saek lai yiengh.

“Seizcin daeuj lo, seizcin daeuj lo!” Roeggacak ndwn youq gwnz nyefaex hemq dwk. Sing hemq de hemq ndiu gofaexliux, gode did gij nyod heuyauyau okdaeuj; sing hemq heuh ndiu gova go’nywj, gyoengqde haenqrengz daj ndaw namh con okdaeuj; sing hemq heuh ndiu raemxrij, gyoengqde dwk yungz gij naehang seizdoeng; sing hemq heuh ndiu gyoengq doenghduz iq, gyoengqde foenfoen byaij ok dou ranz, fwngz rag fwngz guhcaemz, youh diuq youh ciengq:“Gyoengq doenghduz iq geijlai vaiqvued ha! Fwngz rag fwngz, guh youzhiz, seizcin youh daeuj lo!” Dingq gij sing go angqyangz doenghduz iq, yawj gwnzbiengz doenghgo doenghduz cungj ndiu lo, gou simhai dwk riu lo.

Dahsau seizcin doq buet daeuj doq ciengq go, momo gizneix, lumhlumh gizhaenx, di he cungj mbouj youqndwi. Faexiq ndaej dahsau seizcin lumhlex, maj engq vaiq lo; gova go’nywj ndaej dahsau seizcin lumjlex, bienq engq moqsak engq lengj lo. Gyoengq gova go’nywj cungj ngaek gyaeuj vad fwngz coh dahsau seizcin, docih seizcin.

O! Seizcin daeuj lo, doenghgo doenghduz cungj ndiu lo, biengz raeuz engq gyaeundei lo.

(Vangz Sijveij)