Ngoenzneix, daxboh cawj byaek seiz cij fatyienh mboujmiz hing, couh heuh gou bae diengzhaw cawx hing. Gou mbouj siengj bae, aenvih gou damjsiuj, mbouj gamj gag bae, daxboh lumj baenz rox gou damjsiuj, couh naeuz gou, gou cijndei bae lo.

Youq gwnz loh gou doq byaij doq naemj: Gou wnggai baenzlawz cawx hing ne? Cungj hing yienghlawz cij ndei ne? Yaepyet doq daengz diengzhaw. Diengzhaw caen nauhyied, gwnz daiz baij rim byaek; lij baij mak dem, gij mak gak cungj gak yiengh yawj hwnjdaeuj cungj gig moqsien; dan gai noh gai bya hix caenx rim vunz. Gou doq byaij doq yawj, yawjraen miz dan he gai hing, gou gvaqbae yawj le yawj, raen hing de mbouj ndei geijlai, youh laebdaeb byaij baenaj. Youh miz dan he gai hing, miz haujlai vunz cawx gij hing dan de, gou siengj gij hing haenx haengjdingh dwg hing ndei, ndigah gou caenx haeujbae. Gou raen daxbuz he dawz ngauq hing he hwnjdaeuj yawjyawj le, fatyienh ngauq hing haenx deng camx sieng, youh cuengq dauqbae. De youh dawz ngauq he hwnjdaeuj yawj, raen ngauq haenx yienghsiengq mbouj ndei, youh cuengq dauqbae. Doeklaeng de genj aeu ngauq maj haemq soh youh haemq oem he. Gou hix hag gij yiengh daxbuz genj hing, genj le ngauq “bizboedboed” he. Boux gai hing caengh le naeuz:“Maenz haj ngaenz.”Gou sawqmwh siengj hwnj haxbaenh daxbuz gangj gyaq, couh naeuz bouxgaihing：“Lauxbanj, cienh di ndaej lwi?”Lauxbanj ngauz gyaeuj naeuz:“Baengzyoux iq, neix gaenq gig cienh lo.”Gou cijndei dawz song maenz ngaenz okdaeuj, lauxbanj bouj ngaenz hawj gou le, gou daiq“bizboedboed” baema ranz lo.

Doenggvaq baez daih’it cawx byaek, gou ndaej lienh damj swhgeij, bangcoh bohmeh guh di saeh, gou fatyienh gou majhung lo.(Maj Daz)