Gij rumz ndwenngeih couh lumj faj naj lwgnyez, naeuz bienq couh bienq.

Mbwn’gvengq seiz, rumz mbouj lumj mwh seizdoeng baenz yak lo, dauq dwg gig unqswnh、huzsienh, ci haeuj naj daeuj, couh lumj boux daxbuz naj riunyumnyum ndeu rub naj gou, beij gij rumz seizdoeng ci haeuj naj seiz lumj mid camx haenx ndei baenz cien boix fanh boix.

Daengz ngoenz fwndoek, rumz youh bienq diuqbeiz hwnjdaeuj, bae hwnjdangz seiz, couhcinj gou gang liengj, de lij mbouj cuengq gvaq gou, ci dwk aenliengj gou doeng ngeng sae ngeng, hawj fwn rwed gou, haih gou daengz gyausiz le buh cungj mbaeq lo, aeu ceijgaen daeuj uet buh hawj buh hawq.

Ngoenz mbwnraemh, rumz youh mbouj lumj ngoenz mbwn’gvengq seiz baenz unqswnh lo, dauq dwg rongxhuhu, bae hagdangz seiz, gij fwngz gou deng nit dwk gyaengj bae, couh lumj seizdoeng boemz youq gwnz naehang, nit dwk saenzdedded, saenz dwk heuj cungj “doxhoenx”. Hwnj dangz dijyuz seiz, rumznit daj hozbuh、genbuh con haeuj ndang gou bae, fwngz cungj deng nit dwk mazmoed lo. Ae! Rumz ha, mwngz cuengq gvaq gou ba, gou fuk saw lo!

Rumz, couh dwg yienghneix vaekvaeu. Yaep he dwg laeq nyez diuzbeiz he, yaep he dwg daxbuz unqswnh he, yaep he dwg duz iugvaiq yakrwix he……

(Mauz Cinhyeij)