Miz vunz maij gij vadugenh saek ronghlwenq haenx; miz vunz maij gij vameizgvei maez vunz haenx; miz vunz maij gij va’ngaeux ndwn ndaw raemx gyaeugetget haenx, hoeng gou dauq maij gij valeux nding lumj feiz haenx.

Hagdangz dou miz haujlai go faexleux. Moix bi mbwn raeuj va hai seiz, gou cungj maij bae laj go faexleux gvaengzgvax, bineix hix dwg yienghneix. Gou ndwn youq haj laeuz yawj doxroengz, yawj ndaw hagdangz valeux hai gij gingj gyaeundei haenx. Youq ndaw guengh mbaw loeg mbaw heu, gij valeux baenz duj baenz duj haenx couh lumj baenz bog baenz bog feiz dawzyubyub. Mbaw loeg va hoengz, gij gingj gyaeundei neix lamh lwgda gou, ngaeu hoenz gou. Lingz hwnjdangz yiengj lo, gou lij mbouj sij ndaej lizhai.

Gou deng gij valeux gyaeundei neix maez lo, roengzdangz le, sikhaek buet daengz henz cauhcangz laj goleux, siengj dep gyawj yawj gij valeux gou gyaez haenx. Go faexleux hung sang sohnwd, couh lumj dwg bouxbing hen hagdangz. Gwnz nyefaex sangvidvid haenx hai baenz duj baenz duj va, hix lumj gij daengloengz hoengz ngoenzciet venj haenx, nding dwk lwenqda, hoengz dwk maez vunz. Gou cingq maezngunh youq ndaw gingj gyaeundei neix, duj valeux he doek roengzdaeuj, de loenq le hix gig saenzheiq, youq gyang mbwn lij damhdingh yienghgaeuq, baenqlili cigsoh cung roengzdaeuj, yienzhaeuh “ba”sing ndeu ninz roengz gwnznamh dangqnaj gou bae. Gou gip hwnjdaeuj baez yawj, valeux miz haj limq, limqva nanwtnwt, humxhomh bog simva saekhenj he, aen dakva caebcomz gij limzva maenhswdswd, duj de hung baenz lumj aenvanj. Va loenq hix mbouj doiqsaek, hix mbouj reuq, it di cungj mbouj lumj gij va loenq gou baeznaengz raen haenx reuqledled, de couhcinj vutmingh le lij dwg yienghneix maenh’ak. Seizneix gou gamjdaengz gij sengmingh valeux baenz geng baenz ak, de lumjbaenz dawz swhgeij daengxcungq gyaeundei cungj soengq hawj dou, gvaiq mbouj ndaej gyoengqvunz haenh de dwg vayinghyungz.

Valeux mboujdan yienghsiengq gyaeu- ndei, lij baenz guh yw. De ndaej cawz ndat、 leih nyouh、 gaij doeg, mboujguenj dwg va heu roxnaeuz dwg va dak sauj, cungj baenz dawzdaeuj cawj raemxdang. Gvangjdungh miz haj cungj va okmingz, valeux couh dwg cungj ndeu.

Valeux caen gyaeundei. Caen miz yungh ha! Gou gyaez gij valeux daegbied neix.

(Meiz Vanvunh)